歌唱真人骚《中年好声音》今个星期提早喺年三十晚播出，节目展开新一轮个人赛，20位参加者挑选影视金曲出战，争取晋级18强。
丁文俊唱陈百强金曲《当我想起你》，指最近睇日剧讲初恋，令佢谂起读书嘅初恋一段开心嘅往事，而魏嘉信唱林峰嘅《爱在记忆中找你》，因为太钟意TVB剧，曹敏宝唱电视剧《大闹广昌隆》主题曲《抱紧眼前人》，呢首歌系由爸爸亲自帮佢拣，希望大家听到阿女嘅中低声嘅特式。
上一回合团战获得最高分，丁文俊及魏嘉信坦言信心倍增，曹敏宝则不敢松懈，呢日好友朱智贤再次前来支持曹敏宝，何广沛低调现身撑老友何博文，未有事先张扬，希望唔会畀对方压力，何广沛与何博文系中学同学，由中三开始认识，friend足20年，仲系波友同牌友，又会一齐约埋唱K，何博文于半年前更作曲畀何广沛唱，稍后先拍MV放上网。
呢轮个人赛邀请豹哥单立文做嘉宾评判，佢对参赛者夹硬要挑战极限歌，豹哥都会畀啲意见，指有啲歌唔掂得，因为只有原唱者可以handle，希望佢哋多加留意，用呢啲歌去参赛反而好蚀低，譬如梅姐梅艳芳同Beyond主音黄家驹嘅歌，豹哥坦言一讲家驹有好多回忆涌现。
