一个计教刻薄嘅师奶角色，加上贴地家人求上车主题，令「车太」 江美仪 喺《万千星辉颁奖典礼》一举登上最佳女主角嘅视后宝座。《StarTalk》有视后大驾光临，同 王镇泉 分享成果仲有心态改变。
赛前一直呼声甚高，但系呢一届强敌环伺，美仪极其量只估计自己得到最受欢迎电视女角色，点知三太中途杀出得奖，令佢当下心情已经当一年工作正式完结。
美仪同炜哥两位好戏之人当年都系自亚视出身，部份人会认为佢哋一直都被睇低一线，不过今年佢哋两位就双双入围竞逐视后，美仪仲爆早喺入场前红地毡相遇，已经同炜哥讲好，今次佢哋边得得奖都系吐气扬眉嘅一日，更感动得齐齐落泪。
一齐成长、一齐演出大量唔同作品，一齐加盟TVB，相信大家都同意佢哋今时今日嘅地位都实力都不容忽视，亦非常值得外界称许。
荣获视后之后，祝贺如雪片般飞至，不过近年养尊处优嘅 梁洛施 送上祝福，就令大家惊讶大缆似乎都扯唔埋嘅佢哋，点解会认识喇。美仪呢日就解释一切缘于喺节目当中分享过学佛打坐，认识之下仲非常投契经常一齐运动。
入行多年，美仪相识遍天下，不过最令佢感恩嘅，就系认识到Ken哥 郑则仕 ，当年一入行已经身为女主角嘅佢合作经典《肥猫正传》，日日相处之下，美仪就好似一块海棉咁，不断吸收Ken哥所教，无论剧本、走位、演出，都令佢获益良多。
另外一位不得不提嘅，系同样经验丰富嘅 刘松仁 ，另一种演出方法更令美仪茅塞顿开。仲有一位相识多年嘅，亦间接成就《下流上车族》嘅成功，美仪话「Emma婆婆」 鲍起静 参与演出，唔多唔少系因为两人再次合作，认识25年有多嘅佢哋，多场演出都爆发唔同默契，令外界更喜欢呢部剧集。
2013年美仪曾以《冲上云霄II》Head姐嘅演出获得当年嘅最佳女配角，但系之后就有唔同负面新闻传出，令佢嘅形象大受批评之余，亦被放入雪柜冷静。自言当年气焰非一般又乞人憎，仲令自己一发不可收拾，连工作都如入寒冬。
呢个时间开始学佛反思，先理解自己过往嘅无知短视，美仪就话开决改变对待任何人嘅态度。更认为喺疫情之下，能够有《下流》呢次嘅演出，就已经非常感恩，事后嘅所有掌声奖项，就令佢觉得成果更为甜蜜丰盛喇。
同 林敏骢 呢位「失控」鬼才合作，令剧集笑声加倍，亦再令美仪吸收到另一门功夫，仲因为台前幕后所有同事嘅齐心，令剧集有口碑之余亦都锦上添花，亦令上到车嘅车家，剧内剧外相处都俨如一家人。
