J2 节目《铺铺Poker》今晚一集嘉宾系豹哥 单立文，曾经喺电影《赌侠》中扮演大奸角「侯赛因」嘅佢，赌术精湛铺铺几百万上落。戏中仲有无数经典对白，侯赛因奸笑对住刘德华讲「开嚟见我『吐啤』，想偷我鸡？」，呢幕亦会喺节目会重现。
豹哥亦交足戏化身候赛因，一现身就同Poker教父 Ricky讲笑话「帮我换廿万美金先」。节目一开始，豹哥就澄清戏中同刘德华、周星驰铺铺几百万上落嘅戏份，佢话︰「其实真实生活 我冇赌运，啲人以为我赌术好叻，其实我好渣同个心好怯，唔够胆赢钱㗎。」参与节目更系佢首次玩Texas Poker。
主持 郭伟亮 话自《铺铺 Poker》节目一开始，就想请豹哥做嘉宾，仲话豹哥多年来对音乐嘅热诚非常值得尊重︰「唔止对佢音乐造诣崇拜，通常做音乐嘅人都好serious，但系豹哥好有幽默感。 佢拍《爱·回家之开心速递》同拍《赌侠》侯赛因嘅角色好经典，想睇佢同赌台嘅啤牌再发生关系。」
而原来几位J2ers都对「候赛因」一角印象深刻，仲估不到第一铺，豹哥就重现同刘德华对决嘅场面。当时牌局只剩低豹哥同 胡美贻 ，豹哥手上嘅牌正好同台上啤牌组成「吐啤」。最终佢可唔可以因而击败 Nicole，就要留意节目播出喇。
豹哥又话平时多数都系打麻雀消遣，又笑言敢输唔敢赢，因为赢咗嘅钱唔识处理。又自爆有过疯狂岁月，试过有年几两年的时间，每日都系傍晚6点半播新闻时段先起身，佢话︰「𠮶时兴 Rave Party，日头瞓，夜晚就去玩。啲脚有LMF、谢霆锋、何超仪，玩完一个场仲唔够，玩到最后一个场，磨烂席仲周围问人有冇第二个场。」
差唔多每日都系「见光死」，玩到朝早先返屋企。而老婆胡蓓蔚不厌其烦，以「烦音」劝豹哥「唔好咁夜瞓」，豹哥最后都听老婆话，不过对于呢段时光「同以前啲脚倾起，都好有回 忆」。