梁芷珮 喺《非洲潮什么》继续带大家玩转肯雅首都内罗比，首站先到访长颈鹿保育中心喂长颈鹿，而当地人仲话长颈鹿口水有杀菌作用！之后Christy再同大家一齐参观内罗比国家公园，呢个公园仲系世上唯一一个位处首都嘅野生动物园，所以动物非常接近城市，画面相当有趣。
而呢个内罗比国家公园最大卖点就系有犀牛出没，Christy见到犀牛踪影时仲非常紧张：「佢哋真系好大只，会唔会攻击我哋架？真系有啲惊，因为真系好近好近我哋！」旅程尾声Christy又参加咗Coffee tour，除咗大叹靓咖啡，又会体验制作咖啡豆嘅流程。
Christy一家之后乘搭内陆机到马赛马拉体验Safari之旅，佢哋仲非常幸运一次过探访到「非洲五霸」—狮子、大象、水牛、豹同犀牛，佢话： 「导游话我哋好幸运，因为啲豹平时好钟意匿埋，见到豹已经好难得，依家佢行嚟行去系更加难得。」之后仲目击猎豹猎食过程。
而呢次旅程最过瘾嘅，莫过于喺辽阔嘅大草原叹早餐，Christy话：「呢个体验，真系冇嘢可以形容到，净系得一个字，正！你求其畀杯咖啡我饮，我都非常之开心，我去过咁多地方，今次系最正、最好味嘅早餐。」
至于星期三晚最后一集，Christy带埋小朋友到马赛马拉嘅部落探望原住民，喜欢动物嘅囡囡Kasey跟原住民人学揸羊奶，好动嘅囝囝Duncan就同当地小朋友踢用纸搓成嘅足球。虽然原住民生活好似原始简单，但就充满着快乐又无忧。
Christy同原住民交流时仲一度感触哽咽，佢话：「佢哋唔信我哋系一家人，以为系分开嚟嘅游客，因为喺佢哋眼中，老公唔会成日陪住佢哋，一啲好简单嘅嘢都令到佢哋好开心，同佢哋讲我系一个三个小朋友嘅妈妈，佢哋真系拍晒手，觉得我哋系好幸福嘅家庭。」到节目尾声Christy亦有感而发谓：「呢次嘅非洲之旅系非常难得同埋感动，好想再返嚟呀！」
《非洲潮什么》星期一至三晚22:30 翡翠台