日本浅草一间被喻为招财猫发源地、专门求姻缘嘅今户神社，由于最近一套由佐藤健主演嘅大热日剧喺呢度取景，所以吸引到唔场剧迷慕名嚟参观。23号播出嘅《解风东京》，杜如风就带大家去朝圣，仲教大家参拜日本庙嘅正确做法！佢话首先系放 5yen 入供奉箱，因为「5yen」嘅日文发音同「遇缘」相似，然后拜两拜、拍一下手再拜一拜，咗就礼成喇。
唔少人拜完都会画绘马写低自己嘅心愿，平日大癫大肺嘅如风，居然好正经咁写上「不要再遇上坏男人」，佢仲有感而发咁话自己一生遇到太多坏男人，系时候畀返个好男人佢。
事后问到如风点解咁感触？佢话因为之前遇到嘅都系坏男人，几个男友都偷食，不过佢相信终有日自己会遇到好归宿。对于《解风东京》将会喺24号晚播出最后一集，如风都话唔舍得：「有唔舍得因为做得好辛苦，身边朋友赞嘅多，可能耐冇睇到我出镜。开心啰，而家谂紧添食，不过未有头绪。」佢又话欢迎大家提供地点参考，不过由于《解风》由前期制作到出街，要成5个月时间，所以提醒大家要有耐性，至于讲呢转拍摄最大嘅得着？如风说：「无买爆银包，仲有剩钱返香港，所以妈咪都赞我乖。」
而24号晚嘅最后一集，如风重量级推介位于东京都港区嘅超隐世日本馒鱼饭店，系连当地人都未必识去。如风先试咗呢间舖卖3,500yen(约 200 港元)嘅极上鳗鱼饭，大大块鳗鱼咬落去脆卜卜，如风犹如专家上身拆解煮法：「鳗鱼一般都系蒸完先烧，呢度系用关西做法，系全条由生烧到熟，所以特别脆卜卜，仲有好大阵焦味，好似食紧叉烧最香、最㶶个部份。」
跟手又嚟到浅草食甜品，目标系红鹤甜品屋主打pancake嘅人龙店。由于所有甜品都系即叫即做，所以呢间舖系要晨早8点半去到舖头排队、攞飞、填资料、拣时间， 最后交低订金。但如果唔想咁辛苦排队就有得食嘅，记得收睇呢一集，如风会提供一个唔使排队又可以食免费餐，仲要有钱收嘅绝对合法方法！
《解风东京》3月24号晚 22:30 J2 82台 最后一集
