星期五晚一集嘅《隐形战队》邢风( 刘颖旋 饰)同Shadow( 刘佩玥 饰)经过多轮特训，正式踩入虎穴，成功混进「拐卖少女事件」犯人收藏少女嘅货柜，寻回辛Sir( 吴家乐 饰)女儿瑶瑶( 关嘉敏 饰)后，即找紧时机冲出重围，同犯人展开连场追逐同搏火。
其实㖊晚亮点都集中喺Tiffany身上，而之前因为Madam Fong( 江美仪 饰)不想亲女冒险为此争吵不休，直至呢一集，身为妈妈嘅Madam Fong受被害少女母亲嘅伤痛触动，改变主意俾邢风参与直捣虎穴行动，令邢风喜出望外；眼见女儿兴奋又雀跃，Madam Fong 流露出幸福又慈爱嘅笑容，不过邢风离去后又转喜为忧，仲谷出担忧嘅眼泪，简单几个眼神就清楚交代为母内心嘅转折同煎熬。
美仪姐仲大赞Tiffany乖巧又听话，仲话非常难忘第一日一齐开工嘅搞笑事：「𠮶日开厂景，你知佢啲衫几薄架喇，我又唔醒起个厂好冻，我哋两母女就喺度震腾腾，我问：『阿女你有冇衫著』，佢就话：『冇呀，我系得呢啲架咋』，但佢又猛话冇事。」
而Tiffany亦笑指每次美仪姐见到自己，都叮嘱要著多件衫，又搞笑问佢：「真系咁热咩？」提到同美仪姐有多场对手戏，Tiffany就坦言非常幸运： 「美仪姐系视后级，所以一知道同佢有好多对手戏时都好紧张，同埋话晒第一次 合作。但佢好好，我哋未正式开工前，佢有私底下 message同我倾吓套剧、等我可以思考多啲点做。佢唔单止教我，仲畀到我好舒服嘅感觉，令我完全放低紧张嘅心态。」
至于两母女嘅「和解」场面，Tiffany话拍摄时已充份感受到美仪姐角色嘅慈爱同矛盾：「我哋头先围埋一齐睇呢集，我同Moon讲单睇美仪姐眼神，就感受到佢𠮶种担心，同埋对女儿嘅放手同信心，我都睇到好感动。」
其实Tiffany嘅打戏亦非常精彩，除咗同阿Moon练闭气一幕嘅飘逸秀发Look，之后喺货柜将匪徙凌空打到飞起亦非常有型，Tiffany同坏人嘅 「牛仔褛拉扯战」更引起网络热议。Tiffany更自揭角色造型上嘅小秘密：「其实我拍呢套剧时系戴住假发嘅，因为𠮶时我头发仲好短，所以要整一片片嘅假发啪上头发度。𠮶次嘅难度系，每次对手掹我件牛仔褛，都会掹松埋我个假发夹，搞到我成日甩头发，好搞笑。至于挞𠮶吓，其实武师辛苦过我，佢主要系发力去做动作𠮶个，而我就尽力配合番佢做到最好。」
而TVB社交平台日公开嘅NG片段中，镜头前热血又好打嘅Tiffany，私下其实系「遴迍妹」，唔止成日大头虾讲错对白，仲试过拍食药戏时将道具药飞出街都唔知。而每当知道自己虾碌NG，Tiffany都会吐舌、反眼、傻笑、尴尬扮走人或者抱头怪叫，可爱度爆灯。