《肥妈李鼎》今晚第五集主题系「怀念的味道」，肥妈指自己最深刻嘅菜式系「冬菜蒸牛肉」，又透露妈妈会喺牛肉加入麦皮，除咗令口感更细滑，同时仲会令「肉量」大增，肥妈笑指一直被妈妈欺骗：「我阿妈问我点解唔买牛肉蒸肉饼，我话好贵㖞，有一日我唔打斧头储钱买啦，蒸完出嚟成家人喺度闹，细佬妹系咁话好嚡，我问阿妈点解会咁，佢系咁喺度笑，然后先讲畀我听(真相)呀。」
肥妈又回忆最穷困时嗁情况：「得36蚊喺银行，但要养6个仔女，每日都𢱑晒头谂点样赚钱，试过有一日揸住支茄汁同豉油，个仔望住我摇头，我就点头，佢话冇𩠌呀？我话系呀，咁咪茄汁同豉油捞饭啰！」
而鼎爷就指自己最潦倒时靠卤水鸡翼维生，佢话：「廿蚊鸡翼食一个礼拜，鸡全翼一餐食两只，有味咪得啰，最紧要系碗饭之嘛！」而游游嘅童年味道则系捞冷面，仲即场炮制俾肥妈同鼎爷品尝，不过鼎爷就唔太欣赏喇：「讲句得罪啲，系冇层次㗎。」
至于3号晚播出嘅第6集，主题则系「高低的人生」，肥妈指当年自己靠托面粉养起成头家，一个女人一次托起三包重50磅嘅面粉，非常厉害，肥妈话：「当年系有自己同自己斗，同自己讲一定要托起佢，托唔起就冇饭食！」又指当年靠托面粉赚到2千多元一个月。至于鼎爷年幼时就靠批马蹄同剥核桃帮补家计，朝9剥到晚6，同样辛苦。
讲到买楼话题，23岁嘅游游就话希望5年内上车：「我觉得可以置业系人生高峰。」 肥妈透露首次置业经历：「我记得我哋上楼时，细仔系摸住块墙系咁啜， 全家人第一次买楼，系开心到形容唔到！」
肥妈人生首次置业时30岁：: 「有咗6个仔女之后先买，记得用咗28万买，我好豪㗎，一次过买两层，412呎一层，上到楼落雨唔会漏水，直头系梦想嚟！」而鼎爷早于1971年已首次置业，佢话：「当时去咗台湾工作，6千蚊(人工)一个月，70年代6千蚊好紧要㗎喇。」鼎爷指当时打长途电话叫妈妈睇楼，目标系毕架山或美孚一带，惟李妈妈最后作出嘅决定，就令鼎爷崩溃兼大反白眼，想知点解就要留意听晚 《肥妈李鼎》喇。
《肥妈李鼎》星期一至三晚 22:30 翡翠台