台湾职棒啦啦队女神林襄呢日首度嚟香港出席活动，吸引咗大批fans到场，其中更有粉丝系撑住拐杖嚟应援，而呢位啦啦队女神亦都相当识做，以广东话同在场众人打招呼，又不停摆出心 形手势畀大家影相。
趁住呢次嚟香港，林襄除咗周围去玩同打卡外，仲去咗旺角食烧卖、鸡旦仔呢啲美食。佢又分享自己钟意嘅男仔类型，话如果个男仔有黑眼圈、睇起嚟有啲颓废、长头发、个样有啲累嘅男生就最吸引佢，林襄又话自己希望有机会可以同到刘德华合作。自言几欣赏香港男仔嘅林襄，问到有冇机会识返个香港男友？佢就话一切都要睇缘份。
讲到早前推出嘅写真反应好热烈，林襄就话如果有机会都想影一本有香港景色嘅写真，但会唔会成真就要睇公司安排喇。
