陈奕迅嘅世界巡回演唱会早前去到北美站，创下首个华人歌手喺北美Arena开六场演唱会嘅纪录，亦系首位踏足San Francisco Chase Center 开show嘅亚洲歌手，而Chase Center更特别为Eason订造一件刻上佢演出年月日嘅FEAR AND DREAMS黑色外套作纪念。
今次嘅巡回演出，Eason坦言每一站都好难忘，加上有充足嘅休息时间，令佢有时间好好休息声带次余，又可以感受当地城市，见下喺北美生活嘅旧朋友会面。Eason话：「其实我夜晚好少出街， 不过日头有时间就去过睇网球赛，同朋友见下面聚下旧，冇谂过shopping，但竟然都买咗几块网球拍，系Chicago仲迷上左一样新运动，叫做Pickleball，唔觉意又买咗几块拍。」
讲到成为首位华人歌手于三藩市San Francisco - Chase Center演出， Eason就谦称唔系咩特别事：「系咪第一个都唔系咩特别，我最紧要反而系观众睇得开心，明我个骚讲紧咩，最开心系收到唔少歌迷睇完骚啲留言， 佢哋话入场听到好多从来冇听过嘅歌，冇《十年》，冇《单车》，冇咩咩咩......但演唱会完了发现𠮶啲未听过嘅歌都好好听， 现在歌单之中都系我嘅『新歌』，我估佢哋系接收到个骚，呢个先系令我最开心。」
之前有传Eason温哥华站嘅演唱会飞卖得唔好，但当Eason见到全场爆满时，佢笑言：「好多谢你哋， 之前话温哥华啲飞系卖得最差，但系依家又唔系好觉㖞，咪又满晒，几好嘢㖞你哋！我知啦，系你哋慢，听讲你哋系惯咗买飞买得好慢，我差啲谂住咁不如取消咗佢啦。」
由于温哥华系北美嘅尾场，所以安歌时Eason唱咗三首歌，令观众十分开心，之后佢又爆响口话自己就快会出新碟，Eason话：「录咗好耐啦，只碟同Fear and Dreams 好有关系， 好希望只碟可以带到力量俾大家，喺大家经历过好多唔好嘅事、压力同惊恐之后，可以一齐停一停，放松呼一口气， 抬头再望，原来重有路可以继续行。」
