由 陈维冠 监制、 郑成武 编审嘅《罗密欧与祝英台》，10月16号起将接棒《你好，我的大夫》播出，新剧主要演员包括 陈茵媺 陈豪 周嘉洛 游嘉欣 江美仪 蒋祖曼 郑子诚 吴子冲 邝洁楹 同 徐荣 等。
以后现代架空世界为背景的《罗密欧与祝英台》，故事围绕四位主角祝英台(陈茵媺 饰)、梁山伯(陈豪 饰)、罗密欧(周嘉洛 饰)同朱丽叶(游嘉欣 饰)发展，既有凄美浪漫嘅爱情元素，亦有火花四溅嘅型格动作场面，既创新又破格。
《罗祝》嘅故事发生喺超现实世界，讲述同样富甲一方嘅罗家同祝家历尽百年恩怨，虽然平时 不相往来，但每隔五年就会以枪战形式决斗，就住面子同自身利益，两大家族各出奇谋争取胜算，而四位主角间嘅爱情故事亦系呢个复杂在背景之下产生，个中波折同困难可想而知。
虽然主角嘅名字大家都耳熟能详，不过佢哋喺新剧当中嘅人物设定同际遇就会颠覆大众对呢四大爱情经典人物嘅认知喇。根据近日发放嘅首轮剧集宣传预告，主角设定分别系「智勇双全祝英台」、「枪法如神梁山伯」、「仁心仁术罗密欧」仲有「反叛率真朱丽叶」，仲曝光埋两对情侣嘅甜蜜亲吻镜头，每条宣传片后嘅动画版主角介绍亦非常有心思。
而四位主角亦都枪法如神，性格亦各有特点：祝英台全程唧都唔笑Cool到爆；梁山伯赖皮市侩至爱揾人笨；罗密欧谦厚有礼，志愿系帮助贫苦大众嘅仁医；朱丽叶就热爱刺激，为咗最爱嘅枪械同罗密欧，仲多次犯禁同祝家玩对抗。
《罗密欧与祝英台》自开拍以来就备受瞩目，除咗钻石级演员阵容同幕后班底令人引颈以待之外，相隔11年再度喺剧集同框嘅恩爱夫妻陈茵媺同陈豪自然成为焦点所在，新剧更加系Aimee 婚后首部「复出」嘅剧集。
呢次亦系Aimee同阿Mo自多年前拍拖后首度演出CP，不过要真夫妇演情侣并非易事，呢对圈中模范组合就笑指难度在于要压抑自己对对方嘅感情喇，Aimee仲笑言：「因为今次个角色同真实嘅自己完全唔同，好大挑战，要尽量收埋平时嘅自己，除咗讲嘢唔可以太女仔，仲要收起平时对住老公嘅眼神同小动作，要将自己从现实中抽离返。」阿Mo则搞笑感叹拍剧期间犹如「冇咗个老婆」，同时强调全力支持Aimee复出追梦。
另外今次首演情侣嘅新生代组合「洛游CP」中，以搞Gag、贪玩、语速快驰名嘅嘉洛，今次继续发挥搞笑本色，仲加入更多「深情」元素，剧中热爱莎士比亚嘅佢，不时会大抛「莎式金句」晒内涵玩浪漫，又会排除万难誓要与一见钟情嘅朱丽叶爱到底，加上人设善良，入屋指数高企。
而一向以清纯乖乖女形象见称嘅游游，今次以曲发造型登场突显角色Wild感觉，仲会首度挑战 大量型格开枪场面，同样值得期待。
《罗密欧与祝英台》10月16号起 星期一至五晚 20:30 翡翠台