真BL组合「新田公路」推出第四支全新派台单曲《与青春说再见》，首歌由小新许绍燊一手包办曲词编监，曲中嘅钢琴、小提琴、大提琴同口风琴都系由佢亲自演奏。
讲起呢首歌，小新表示自己创作呢首歌时正系自己人生最迷惘嘅时候：「写呢首歌嘅时候，屋企经济上出现巨大转变，适逢我刚辞咗份正职，转为夜场嘅全职歌手。见到身边啲大学同学都结婚生小朋友，有稳定嘅收入，开始质疑自己嘅存在意义同价值。我嘅迷惘，就系成长，唔知点样应对呢个世界。」
而喺田中田见超眼中就觉得呢首系道别歌，道别一个状态，走向另一个阶段，田中表示：「歌入面嘅青春唔系讲紧年龄，而系一个状态。以我为例，30岁前，尽管年纪同历练增长咗，但系内里仍然觉得自己停留喺17岁嘅高中时期，唔系话刻意唔想成长，而系生活中嘅环境、际遇，或者系一啲阴影，令到你觉得冇需要，或者冇能力跨过自己嘅17岁。」田中分享指自己当时听到小新呢首嘅Melody时，自己正喺度插紧花，当时佢听完后，田中就同小新讲：「系你写过嘅Melody最好听嘅一首。」
