台庆剧《新闻女王》，即将喺翡翠台隆重登场，呢部已经正式展开宣传嘅重头剧集，今日亦透过社交平台公开六张主要角色嘅最新人物造型宣传海报，包括「文家军」文慧心( 佘诗曼 饰) 同徐晓薇( 何依婷 饰)，「佐治党」梁景仁( 马国明 饰)同许诗晴( 高海宁 饰)， 以及「中立派」张家妍( 李施嬅 饰)同刘艳( 王敏奕 饰)。
而海报嘅宣传语句：「人生就如这棋局，从来没有人能够真正掌控时代，而那些玩弄时代的人也终将会被时代所淹没」、「提醒女王们～棋局已布置完成，执棋之人亦是棋子，究竟谁才是真正赢家呢？」意味住故事所围绕嘅SNK电视台中，每日都有唔同办公室博奕，每分每秒充满变数之余，边个摆布别人定系正被摆布都难分清楚。
六位演员以新鲜感十足嘅维多利亚时代造型亮相海报，阿佘身穿全黑透视公主袖宫廷服上场，配以权威眼神同纤幼腰肢非常抢镜；另外以超低胸宝蓝色宫廷服造型上阵嘅高Ling，加上一身蓝宝石首饰同样系无点所在。而李施嬅同何依婷就分别以近似款式嘅白金造型亮相，王敏奕则以暗红色造型出现各具美态。
五位女演员头上都戴上唔同款式皇冠，以突出「女王」主题。 《新闻女王》总监制 钟澍佳 受访时，就直指锁定维多利亚时代作为造型重点，系希望打造出贴题女王感：「我哋其实一开始就计划要拍一个职业剧，新闻概念我相信观众都好清楚知道，剩番落嚟就系点样将女王同战场呢个概念、以更有视觉效果嘅方式呈现畀观众。所以我就同负责海报设计嘅同事Leo商量，用咗呢个Image。」
佳导指自己非常满意海报效果，更坦言单系拍摄呢辑海报，台前幕后已花接近三日时间，足见制作团队嘅认真。据知六位主角面前嘅「道具」亦各具意义，六人之中只有王敏奕面前没有棋子，而只有一本打开嘅书籍，佳导被问到系咪寓意其角色清纯时笑言：「都啱架，因为王敏奕佢系冇归类，唔系任何人嘅棋子。」
至于其他角色设计意念，负责海报设计嘅Leo就补充：「阿佘面前除咗王后棋、其他棋都冧晒，代表住佢嘅霸气。至于马明成盘棋摆晒出嚟嘅意思，系想打造稳重同深思熟虑嘅感觉。施嬅面前有两只平排嘅棋，想畀人感觉佢好公平，打造正义感；至于依婷，我哋就想sell靓靓少女Feel，所以背景用咗玫瑰花。而高Ling面前嘅骑士棋就代表住冲锋陷阵嘅感觉。」
