由 肥妈 李家鼎 同 游嘉欣 主持嘅《肥妈李鼎打大佬》嚟紧就会播出最后3集，主题分别系「退而不忧全攻略」同埋「一团和气闯年关」。讲到理想退休年龄，肥妈、鼎爷同游游又出现好大分歧，游游讲笑话想40岁左右退休，吓到肥妈眼都凸埋：「咁咪即系唔使做？你谂住吊金龟算喇？」
之后肥妈追问游游觉得一个月几多「使费」先够? 游游讲出一个数字后，肥妈非常愕然仲大赞游游「娶得过」！之后肥妈再追问游游：「你认为几多钱先够退休？」游游天真咁话：「假使我40岁开始唔做嘢，而自己又活到80岁，咁我仲有40年人，我估要400万？」两老听完大呼「冇可能」﹗ 岂料游游反而愕然表示：「400万都唔够？」当见识到游游「数口」有几差之后，肥妈即一句KO游游: 「食爷饭，著乸衣」(意指靠屋企人)，游游听完一脸惭愧谓：「都系嘅，同屋企人一齐住使费比较低！」
因为无咩钱银观念，搞到喺节目中连番被追击嘅游游，本著「好学」精神向两老请教储钱大计，肥妈鼎爷即大方分享老一辈的「悭钱经」，肥妈话以前阿妈教佢哋，一出粮就要买金戒指，几薄都好。咁到年尾就有12只，夹埋就可以换只大戒指，而鼎爷就认为最紧要识忍手：「例如我钟意𠮶样嘢，我依家唔够钱，我就下决心挨多两组(戏)，储多啲(钱)就买到喇。」肥妈听完即大爆自己当年辛苦储钱买完一样「恨咗好耐」嘅心头好后，反而跌入困局嘅趣事。
肥妈同鼎爷又追加分享「襟捞大法」，肥妈话：「要抵得谂咯！人哋叫你做嘢唔好问几点收工，要做多过自己嘅本份。」鼎爷就以胡枫修哥做例子，叫大家无论咩年纪，工作最紧要识Enjoy，并扬言做得演员，有一件事绝对唔好介意咁话。
节目中，肥妈同鼎爷除咗大讲农历新年传统同习俗，肥妈仲自爆花生指数极高嘅新年开骚逗利是秘技，并分享「赌城利是战衣」必胜法系V领设计同两个胸围，肥妈仲话最丰收一次，系一场稳袋高达六位数「利是」。
钟意食花生嘅三人，又大爆「艺人利是秘闻」，肥妈爆出因为一个原因，好少人够胆埋郑裕玲身逗利是；至于游游就透露有传闻指家燕姐嘅利是有神秘力量，想知系咩？咁就要密切留意最后三集《肥妈李鼎打大佬》喇。
《肥妈李鼎打大佬》最后三集 星期一至三晚 22:30 翡翠台