嘉许本地舞蹈艺术嘅首届《Figure OUCH! 2023年度颁奖礼・华丽舞蹈派对》日前圆满举行，当晚向业界杰出表演者一共颁发23个年度舞蹈奖项，创始人钟舒漫 有份得奖嘅 李幸倪 同 ANSONBEAN 亦亲物支持，加上现场200位参与表演嘅舞者，令气氛热血又热烈。
呢晚大会共颁发9大项目23个奖项，各个奖项由提名至投票都贯彻零门槛、零筛选宗旨，所有奖项都由全民票选诞生，无论系舞台前方嘅歌手、演出舞者定系幕后编舞、导演亦被囊括其中。
获选「年度MTV舞蹈演出」嘅 李幸倪 同 ANSONBEAN分别到场领奖。凭歌曲《Dum Dum》夺奖嘅Gin Lee受访时话：「好开心、拍跳舞MV真系唔容易，背后有好多环节，好多大家睇唔到嘅准备功夫。呢个奖唔止属于我，系属于整个有份参与呢首歌嘅舞者同导演。慢歌要有好多情绪，件事好个人，但系跳舞要配合嘅嘢就多好多，我仲记得拍《Dum Dum》MV前𠮶两个月，我日日都去排舞排5个钟。跳舞冇得呃，所以我好尊重每个舞者，用尽佢哋身体嘅力量去换演出时𠮶份靓。」
Gin Lee又透露稍将再推出跳舞新歌：「今次行性感同型格路线，但系冇佢哋咁劲，而家操定啲肌肉，等随时可以骚出嚟。」
而ANSONBEAN就凭《Get Wild》演出得奖，佢直言往后会推出更多舞曲：「我想做呢类 Club 歌好耐，嚟紧都会造多啲Dance同R&B。我好钟意跳舞，因为自己个性格都比较冲动，跳舞就可以攞到个力度出嚟，好似平衡返自己咁。」
而身为主办单位创始人兼颁奖嘉宾嘅Sherman，由去年嘅大型跳舞汇演到今年嘅颁奖礼，都话要感谢王君馨：「系王君馨话要有个颁奖礼，歌手、演员、广告界都有颁奖礼嘉许，但系舞者就冇，所以我哋就搞个颁奖礼表扬返佢哋。」