新剧《本尊就位》已经播出咗三集，过去两晚剧情主要围绕「温香玉院」入面，陈嘉慧饰饰演嘅花魁雪花，以「盛夏初雪」之名卖初夜嘅故事。一心希望将初夜献给文人雅士嘅雪花，计划将初夜变成文艺比拼场，只要凭票入场并胜出赛事，便可得到雪花初夜。一直垂涎雪花美色嘅金士豪／金爷（韦家雄饰）以横蛮手段收购所有入场券企图独占雪花，点知中途杀出个「程咬金」雷石／吕洞宾（谢东闵饰），不过最终都系金爷顺利胜出。
为保初夜，雪花扮厉鬼上身吓退金爷，事件最终演变成杀人事件，雪花以嫌疑犯身份被捕入狱；急色嘅金爷为尽快得到雪花，竟然谂到同镇内警察串通潜入监狱与雪花相好，雪花千钧一发之际谂到以「鬼影」奇招吓退金爷，力保贞节。讲到同家雄合作，Erica话获益良多，但副作用系要忍笑：「好开心可以同家雄哥合作，佢系好资深嘅前辈，佢拍剧好有自己风格同节奏，仲要系好难模仿到，真系好值得学习。我都有听过个个同佢合作拍戏都忍唔到笑，我同佢拍时都系咁，佢成日用气声嗌『雪花』（拉长尾音），仲要唔知点解啲对白同动作一经过佢，就即刻好有喜感。」
喺剧中角色自毁花容扮鬼一幕，Erica指「交叉疤痕」原来相当考功夫：「个交叉疤痕系要事前整好晒嘅，化妆同事好好、用咗好多时间研究点样可以像真啲，因为每一次康复程度唔一样，所以血嘅深浅都会唔同。有时现场拍拍吓个疤会突然跌落嚟要贴番上去、又或者还原番正常样都好花时间，所以都好多谢大家成日咁有耐性咁去等我。」
Erica为咗扮鬼，足足大叫咗成晚：「我全程鬼叫咗成晚，叫到喉咙都痛埋；因为要就角度，拍咗好多take。」官方今日（1日）释出嘅NG片段，Erica同家雄演对手戏时错漏百出，除咗讲嘢走音，连环忘记对白兼讲英文，令家雄哭笑不得。另外，Erica扮鬼望后怒吼一幕，因为家雄夹嚟夹去都捉唔准时间，结果令二人差啲真咀，家雄因而吓到眼都凸，场面爆笑。另Erica仲喺个人社交网上载咗拍弹古筝场口同Close Up疤痕「真身」。
饰演妓女杜鹃嘅刘嘉琪亦甚有发挥，因妒忌雪花获特别待遇，杜鹃不但加以针对，仲将雪花「初夜」题目秘密卖畀金爷。而杜鹃离奇死亡，所有表面证供均指向雪花，因而引发连番风波。到底杜鹃之死同雪花系咪真有关系？就要收睇《本尊就位》喇！
《本尊就位》逢周一至五晚8:30翡翠台播映