王镇泉 Jeoffrey 每星期为你提供最热辣电影资讯，中外猛片专访花絮上映时间全部集齐，「电影泉攻略」每周四买定爆谷陪你睇新戏。
《SPY X Family》可以话系红遍全球，周围都可以见到佢哋嘅踪影，喺千呼万唤下佢嘅剧场版终于都要上映喇！今次剧场版将会由动画嘅副导演片桐崇执导，而本身动画导演古桥一浩就会担任顾问。故事舞台会由日常生活跳去冰天雪地，展开一场解决世界危机嘅家庭旅行。
新片速递有《剧场版 SPY×FAMILY CODE: White》特务黄昏为咗保住饭碗，誓要令安妮亚喺伊甸学园嘅烹饪班入面夺得星星，于是提议制作传统甜品，仲一家踏上首次家庭旅行，点知旅途中安妮亚发现一个装住奇怪朱古力嘅行李箱，仲误吞呢粒足以左右世界命运嘅朱古力！
《特工亚皆老》由《皇家特工》导演执导，讲述【亚皆老 Argylle】系列小说作者，每日只系向往著同电脑同埋猫猫喺屋企渡过每个宁静夜晚。点知佢嘅小说内容喺现实生活中发生，惹来了特工亚皆老同间谍组职关注，令佢嘅生活不再平静。
好快就上映嘅《蜘蛛夫人》，作为蜘蛛侠宇宙嘅外传电影，一直引嚟外界唔少猜测，亦有传电影入面会出现蜘蛛侠嘅亲生父母，但到底系边一代嘅蜘蛛侠就未知喇。但因为有传《蜘蛛夫人》设定嘅时代背景系上世纪90年代，后来突然要重拍，删走晒90年代嘅镜头，改为喺2003年发生，大家就估系咪想揾较年轻嘅Tom Holland做呢个宇宙嘅蜘蛛侠呢？究竟系点就要等电影上映先有答案喇。
本周票房战况截至1月31号中午，第3位系《蜂神恶杀》、第2位《潜行》、第1位就系《金手指》。
