孔德贤同谢东闵喺剧集《本尊就位》，为咗拍摄1号晚播出嘅古井逃生戏，可以话系相当大牺牲！佢哋除了要花大量力气谂办法以背对背形式爬出古井外，更要全程浸喺水入面，而最令人难忘嘅，谢东闵虽然跌咗落井底，但仍然疯狂说教，搞到佢硬食大量人造雨，头发仲因为湿晒而变成「比达Look」，相当爆笑。至于同喺井底嘅孔德贤，虽然唔使应付咁多对白，但被人造雨疯狂「袭击」嘅佢，搞到面容扭曲双眼都睁唔开，十分夸张。
谢东闵受访时，坦言井底戏拍足两日，并透露同孔德贤嘅「二人四足攀井」场口，系喺棚架、威也及动作替身帮助下完成拍摄，佢话：「呢场戏差唔多临尾声先拍，𠮶时已经开始变冻，落水都真系几冻。我哋𠮶场系吊威也，同埋搭咗个好大嘅景，都拍咗两日㗎。」
是次谢东闵饰演嘅「烦音」吕洞宾相当出位兼入屋，佢受访时坦言有被古文考起：「啲古文真系背得好辛苦，呢套系我拍咁多套背得最多古文嘅一套戏，有啲仲要我自己都未必好明，所以都要花好多时间研究。」虽然吕洞宾「烦到冇朋友」，但正正因为「做乜都错」，反而成功入屋，有网民留言笑指谢东闵角色系「戆居得嚟几好笑」，对此东闵笑言：「系呀，我自己就设计咗神仙同凡人有代沟呢个位出嚟，咁样希望出嚟效果搞笑啲，好多谢网民睇得开心。」
另外，黄建东亦喺社交网补充，指拍摄呢场戏时，当晚只得十度，虽然拍得辛苦，但佢笑言 Enjoy，皆因好钟意自己个悲情角色：「拍戏永远都系咁，平时又唔见咁冻，到拍𠮶日半夜超冻，好似得 10 度，我𠮶阵又唔识得用保鲜纸打底，一路跪喺泥地一路打住冷震咁讲对白。」
除咗主角，《本尊》配角亦甚有发挥，刘嘉琪饰演嘅杜鹃，佢嘅死亡事件目击证人傻姑梁珈咏，喺2分半钟嘅演绎入面明显花尽心思，除咗刻意以小孩 tone 讲对白，眼神亦相当孩子气。其中一幕边忆述杜鹃被杀经过、边嘟嘴撒娇及企图推开雪花(陈嘉慧饰)只手作自我保护，更加睇得出珈咏已完全进入状态，讲到激动处时仲会眼泛泪光。有「御用师奶」之称嘅「大头妹」梁珈咏，入行 24 年演过剧集 超过 100 套，直到前年终凭参加《全能司仪选拔大赛》打开知名度，当年珈咏喺节目中一句励志 bite：「我都真系仲有坚持紧」感动唔少观众。
《本尊就位》逢星期一至五 20:30 翡翠台
