嚟紧嘅周末，香港全城进入足球狂热，两代球王包括碧咸同美斯访港，碧咸以球主身份率领美职联球队国际迈阿密来港跟港队作表演赛。球王魅力非凡，连丁子朗同胡鸿钧都抽空去到美斯入住及球队举行记者会嘅酒店，佢哋仲拎埋美斯嘅波衫嚟应援，希望一睹球王风采。
美斯与所属嘅球队乘坐嘅包机喺今日（2号）下午三点抵达香港国际机场，美斯贵为球王，但系非常贴地，亲自拎住随身行李落机，随后大队喺停机坪出席简单嘅欢迎仪式。当球队乘座嘅巴士抵达酒店时，现场嘅球迷即刻报以热烈嘅欢呼声，仲大叫美斯嘅名，而美斯落车时亦好亲切向球迷微笑挥手。据知碧咸较球队早一日抵港，再出席私人商业活动，相信球迷都好期待到时喺球场一睹两代球王同场嘅画面。
