炎明熹（Gigi）原定去年10月8日举行《炎明熹Gi-FORCE演唱会》尾场，因受台风影响而临时取消，主办单位今日公布有关补场安排，同时宣布Gigi将于4月13、14号，再次喺九龙湾国际展贸中心汇星，举行两场演唱会。
虽然去年未能顺利完成两场演唱会，但Gigi讲过相信呢个上天畀佢最好嘅安排，令佢有更充裕嘅时间，好好装备自己，将更好嘅演出呈现给观众，Gigi认为：「唔系话专登讲啲说话安慰自己，的确系可以再做好啲，所以今次再开，虽然演唱会主题冇变，但歌单、衫、编排上，同上次有少少唔同，我同演唱会团队所有人都希望可以再做好啲。」主办单位现安排4月14号为补场场次，同时加开4月13号一场，门票喺2月26号公开发售。换言之，连同去年10月7号已举行嘅头场，Gigi今次《炎明熹Gi-FORCE演唱会》，一共会举行三场。
Gigi多谢公司对自己嘅信任：「听到呢个消息，内心好兴奋，同时亦有压力，完成埋手头上倾好嘅工作，我就会开始闭关，做运动、练歌，同埋而家最头痛系请边个做嘉宾，如果大家有好嘅提议，可以去我社交网站留言话我知。」有关补场安排所有持有2023年10月8号完整门票（连同票根）嘅观众，可以凭票于2024月4月14号直接进场欣赏补场，观众可按原有座位观看，毋须更换门票。 所有经由快达票购买门票嘅观众，如未能出席4月14号补场场次，可选择更换2024年4月13号场次，或申请退款。 
而打算换票嘅观众，主办单位会喺2024年2月9号至2月22号期间，于官方网页提供连结，观众填妥换票表格后，主办单位会透过WhatsApp（60297778）发出确认短讯，客户可于2024年2月19号至3月15号期间，于办公时间内携同完整门票（连同票根），到「九龙湾国际展贸中心」售票处办理换票手续。 
经快达票使用信用卡付款而打算申请退款嘅观众，填妥申请退票手续表格后，可在2024年2月19号至3月15号期间，于办公时间内携同完整门票（连同票根），到「快达票办事处」办理退票手续，门票金额于收妥退款申请后45个工作天内，全数退回用以购票嘅信用卡内；至于以现金购买门票嘅观众，填妥退款申请表后，门票金额将以现金即时发还，申请人需即时核对及签收确认。