Rosanne黄婉君作客《StarTalk》接受主持许文轩访问畅谈新歌，相隔18年再出新歌，Rosanne话最初都感觉有啲惊，当被人问到对上一次几时出歌时，自己数一数原来已经系2006年，而今次出歌佢形容系顺其自然，因为接拍咗个韩国代言人洗头水广告，所以同时推出一首跳唱快歌嚟个突破。
今次新歌叫做《帅起来》，同新晋填词人张楚翘合作，Rosanne指对方写过好多出色作品，而今次收到首歌就经已心郁郁，兼且讲到佢心底想表达嘅嘢，Rosanne又认为不论男女都可以帅起来，经历过由女儿、太太、妈咪等唔同角色，佢好想藉住新歌鼓励一众妈妈级嘅女性都可以活得精彩。加上Rosanne留意到现时组合都以唱跳为主，所以萌起新歌挑战跳唱曲风。
首次挑战跳舞，Rosanne话只要能够跳到唱到已经好满足，暂时仍然系排舞阶段，两者仲未可以同时做到。再次踏入录音室录歌，Rosanne用咗三个月时间由监制去锻炼返佢把声同歌唱技巧，经过呢段时间嘅学习，Rosanne都话录音进度都比预期快，三个钟已经完成。录音时候都有勾起Rosanne以往录音同拍MV时嘅开心片段，佢都话自己好挂住以往跑宣传，喺七人车入面换衫同食饭嘅时间，每次喺活动现场跟粉丝见面。
2R就嚟出道21周年，Rosanne透露以往都有主办洽谈佢哋开骚，不过两姊妹都要兼顾家庭事业，较难抽时间做骚。其实佢哋不时都会收到粉丝私讯询问几时合体，佢都承认好对唔住班粉丝，因为2R隐退后专注生活，甚少同粉丝互动，所以希望新歌可以当作礼物送畀粉丝，佢又讲到现时唱歌嘅心态都希望长做长有，因为本身好钟意唱歌。
Rosanne现时除咗照顾家庭，又有经营牙科诊所生意，而家再复出幕前唱歌，日常生活都非常之忙，Rosanne就话衬仔仔朝七晚四返学期间，佢就返工同学跳舞，除此之外，佢仲透露而家仲写梗一本关于小朋友嘅书，而写书系被妹妹启发嘅，Race话佢有好多凑小朋友嘅法宝，因为两个仔仔自细都食好多蔬菜，无病痛同无睇过医生，不如将呢啲方法去同大家分享，Rosanne话秘诀系要由BB阶段做起。即使全日都停有嘢做，佢话而家好享受呢种忙碌嘅生活。
