荷里活科幻电影《沙丘瀚战2》喺韩国首尔举行首映礼，我哋嘅主播王镇泉就独家直击呢个盛大场面，会场吸引二千名粉丝一早塞满场馆，有甜茶之称嘅影星Timothée Chalamet、Austin Butler同Zendaya盛装出席，面对住在场粉丝嘅要求，不论系合照定系签名，甜茶全部都有求必应，不过当佢步入场内，现场开始有啲混乱，期间有粉丝被推跌，需要保安护送离场。
事件无影响首映礼，甜茶继续喺台上同粉丝互动，仲摆出韩式心心手势畀大家影相。同场嘅Zendaya亦一样咁亲民同粉丝签名合照，而Austin Butler同样受大家欢迎，听到现场有粉丝早一日到场霸位等候，佢哋都好感激大家支持。甜茶除咗喺台上多谢大家厚爱同支持，仲分享一个粉丝好期待嘅消息，就系希望大家好好欣赏续集，可能会有第三集同大家见面。Zendaya见到眼前企满支持自己嘅粉丝，佢都话成个画面好靓，好多谢大家嘅热情欢迎同友善嘅接待。Austin Butler同样感谢大家嘅热情同等候。
