姚焯菲(Chantel)虽然已经飞返新西兰继续升学，不过佢临飞之前都录制咗首新歌《初心小岛》，等一众小菲象们可以止止渴，新歌上架一个月就破百万点击。Chantel仲首次现身音乐节目《J Music》献唱新歌，讲起歌曲背后嘅意思令Chantel有唔少反思。
Chantel最初收到歌曲Demo时，感觉好似韩剧主题曲，不断思考填咩词先贴切现在自己嘅年纪同状态，最后歌曲系描述初心嘅自己，仲话因为初心嘅自己先系最纯粹，无忧无虑。不过讲到钟意初心嘅自己定系见识多咗成长后嘅自己多啲？Chantel就话：「呢个好问题，两样钟意，但更钟意眼界开咗嘅自己，接受成长过程。」
喺节目上Chantel会同潘静文及《声梦传奇2》嘅刘芷君合唱《浪漫候群症》，三人合唱为观众带嚟惊喜，就连Chantel觉得今次嘅组合好特别，期待三人合体感觉。另外，Chantel亦有同冼靖峰(Archie)合唱《隔离》。
