Ella 陈嘉桦 出席代言嘅洗头水广告，不过大家嘅焦点就唔系放喺佢点护理一把秀发，而系有冇同老公鸳鸯浴增进感情，一向敢言嘅Ella就话年青时都会互相帮忙下，到而家就无呢回事。佢话如果自己冲凉冲到一半，老公冲入浴室嘅话，其实只系想打尖冲凉冲快啲，Ella又话自己会帮老公帮佢吹头发，不过老公就唔会咁做，除非要佢开声要求，因为老公系一个唔会主动嘅人。
日常生活中，只要Ella开到声，老公就会即刻去做，但系原来当老公想叫囝囝劲宝帮佢拎嘢时，劲宝就会讲「你自己的东西为甚么自己不拿，你是在把我当佣人使唤吗!」但调转系Ella叫劲宝帮手，就永无拒绝，尤其系Ella病嘅时候，劲宝仲会暖男上身照顾妈咪。
讲到白色情人节，Ella收到老公送嘅花，原来啲花系佢老公借花敬佛，将总监畀佢嘅花转赠畀Ella，但Ella就唔介意老公此举，仲怕怕丑丑透露喺情人节时，衬囝囝劲宝休息时，两公婆嘅甜蜜庆祝闺房事。
