《再见‧枕边人》剧集踏入结局篇，终极Big Boss身份即将曝光，虽然可疑人物愈揭愈多，但亦有角色释除嫌疑回复「好人」身份！一直为好友杨万森（马德钟饰）跟踪兼查探晴天（黄智雯饰）嘅「老鬼」鲁正辉（徐荣饰），因为晴天「爆大镬」将当年凯晞建筑工业意外嘅绝密录音公开，令老鬼终得知自己当年因为老友万森一己私心而白白坐咗两年冤狱，佢太太仲喺期间因病离世，令老鬼被囡囡佩珈（史颖乔饰）视为最大仇人，因而变得叛逆。老鬼得悉真相后怒气冲冲揾万森对质，兄弟情决裂！ 
直到㖊晚（27号）一集，佩珈睇到晴天报道后得知爸爸原来先系受害者时，即下厨煮「妈咪牌」咖喱孝敬爸爸，两父女相隔多年后终于冰释前嫌，老鬼自责地向佩珈道歉：「以后有老窦照顾你，你唔使再一个人……以后有老窦，我会十倍补偿番畀你。」佩珈就好激动闹爆杨万森做「贱人」：「都唔关你事！你明明系受害者，系你𠮶个所谓嘅好兄弟累到你坐监，累到我哋屋企搞成咁，系呢个贱人呀！」最终老鬼因为知道万森一直借钟点工人丽姐张相假扮系佩珈嘅「大姑妈」，一直喺佩珈身边默默支持同打气时，亦决定原谅万森。
徐荣指演「老鬼」一角有难度，因为佢一直视万森系好兄弟，到头嚟发现自己被利用，要喺极短时间入面突然转变心态并唔容易；徐荣续指当咗爸爸后，对演出爸爸角色有帮助：「因为会有少少代入咗，如果真系自己，会点呢？情感方面系会有帮助。同埋我觉得小朋友真系需要父母陪伴多啲，因为史颖乔呢个角色就系老鬼冇陪佢，妈咪唔喺度令佢性格变得反叛同孤僻啲。」
《再见‧枕边人》结局篇｜逢周一至五晚8点半翡翠台播映