2014 年一首《高山低谷》令到Phil 林奕匡嘅唱作人身份得到广大嘅传播同肯定，为佢带来无数奖项同掌声，成为其代表作之一。《高山低谷》对 Phil 来讲，不单只是一首佢笔下之歌，更有极其深远嘅意义，它记载住Phil由低谷到重新企起身，除咗人生高低经历之外，更以歌曲鞭策自己，唔好放弃继续行落去，创作出更多触动人心嘅歌曲。
适逢《高山低谷》推出十年之际，Phil宣布将举行音乐会，邀歌迷一同见证一路走来嘅成长轨迹。Phil话：「眨吓眼就十年，呢十年经历咗好多事情，由我最迷惘到开始有啲成绩，登上舞台开到个人演唱会，做到好多自己意想唔到嘅事，仲有组织自己嘅小家庭。」十年变化之大，令 Phil 无论系个人或者创作都更加成熟。
而早前兴奋宣布将为人父嘅Phil，人生即将迎来更多挑战，同时亦都享受到前所未有嘅喜悦：「你哋睇住我成长，我嘅歌亦一样陪伴著大家成长，见证好多歌迷由读书到踏入社会工作，甚至结婚生儿育女。」Phil嘅歌曲系唔少歌迷嘅人生印记，所以Phil都好期待同大家一同回顾十年音乐路嘅点滴。