由 萧正楠 吴若希 赖慰玲 朱敏瀚 主演嘅剧集《奔跑吧！勇敢的女人们》呢日举行煞科宴，场面热闹。剧集由开拍到煞科只系用咗70几日，Edwin感叹时光飞逝嘅同时，亦觉得呢段日子过得开心又难忘，佢话由于大家相处得好愉快，所以剧集咁快煞科，自己都好唔舍得，而最难忘嘅就系拍摄期间自己生日，剧组上下帮佢庆祝咗几次生日，真系好有爱呀！
四位主演都系演得又识搞笑嘅高手，不过Edwin就被Winki同Jinny公认为最有喜剧细胞嘅人，Winki话同Edwin对戏成日都要焗蟹，无论Edwin做咩都充满喜感，所以经常忍唔住NG。
处境剧《爱回家之开心速递》一向紧贴潮流又创意十足，近日更大玩《新闻女王》主题，呢日 邓智坚 呢个正版飞爷都有点评下戴耀明模仿「飞爷」嘅表现，智坚搞笑话戴耀明扮得唔够似，原因系奶茶饮得唔够多，不过佢就大赞爱回家剧组用心，无论布景或者灯光都几乎做到神还原。
煞科宴通常就应该要放开肚皮食餐饱，不过 唐嘉麟 就话自己要就住来食，原来佢因为要做身体检查，所以饮咗泻药，佢仲搞笑话已经霸定个厕所，其他人不得内进呀！
