颜国梁 两年前不幸患上鳞状细胞癌，一直乐观接受治疗，近日终于完成所有疗程，呢日更同阔别萤幕30年嘅太太 霍洁贞 ，罕有合体现身 梁思浩 主持既节目《直播灵接触》做嘉宾。颜国梁谈及今年年初因为癌症复发，昏迷留院半个月嘅经历，当时半只脚踏入鬼门关徘徊生死边缘，幸好太太四出寻求方法为佢续命，去到济公庙诚心祈福，先令佢可以来回地狱又拆返人间。
颜国梁经历生死一劫后感激太太：「之前几十年我照顾佢，今时今日因果循环，少年夫妻，老来伴，大家照顾大家。」颜国梁表示喺15日嘅昏迷期间，曾经有唔少奇怪片段浮现，至今仍然历历在目：「 到时到候就有两个医务助理嚟捉我走，我唔畀佢捉，我感觉到唔系善意，因为带住氧气罩有少少移咗位，佢唔系嚟帮你移番正，当你整返好时佢哋又出现，想拉我唔知去边，后来转咗病房就冇事。」
幸好喺抗癌路上，颜国梁一直有太太照顾同支持，经过鳞状癌肿瘤切除手术后，电疗疗程完结，见佢精神状态唔错，明显比之前更加饱满，颜国梁话目己胃口唔错，只系有啲攰，同埋声线未完全回复，已经无食任何治疗药物，但有进食营养品。
虽然经历一场大病，喺鬼门途过一劫，但颜国梁对死亡似乎唔太恐惧，仲好乐观话：「边个人会唔死，好人、坏人都要死，我71岁，只系排紧队，系人生过程，最紧要活在当下同开心，唔好死得辛苦，人一出世开始就系等死架啦。」
