J2台主持文颂男（Koba）去年10月确诊患上罕见癌症「尤文氏肉瘤」（Ewing’s Sarcoma），全面停工及积极接受治疗，惟病情反复，Koba日前公开筹募医药费，盼能减少痛楚。 戴鸭舌帽及口罩嘅Koba㖊日喺友人陪同下，接受电台节目访问，撑住拐扙现身，Koba全程表现乐观及笑容满脸，以笑迎战癌魔。 
Koba指当得知自己患癌𠮶阵冇咩特别感觉，反而十分冷静，「因为未反应得切，返到屋企沉殿咗几日，先越嚟越担心同焦虑，又要谂点样同公司、家人、朋友点样交代。」 28岁Koba於单亲家庭成长，12岁时父亲有外遇离家，家庭顿失经济支柱，又欠下好多债务，Koba透露自己童年过得十分反叛，经常逃学及不归家流连街上，「浑浑噩噩过咗一年，突然醒觉唔可以再无所事事同生产力，当时只做外卖收入好少，觉得人生唔可以再系咁，跟住返咗学校读书，直至大学毕业」。
Koba加盟J2台担任主持一年便发现有恶性肿瘤，但佢坚持到行动不便才停工，「因为我真系好钟意返工，唔想浪费每一次出镜」，惟要面对庞大医疗费同生活支援，Koba日前喺IG公开筹务医药费，「剩系覆诊做电疗可能只系几十或几百元，最贵系照Ｘ光，因为公立医院要等半年先有报告，去私家照要万几至二万，仲要局部照，呢个系最大负担，而家短期内要几十万先够我维持几个月嘅医疗费用。」谭玉瑛作出呼吁：「希望大家听到之后，可以畀颂男多啲支持，令佢可以继续做自己钟意做嘅嘢。」 
Koba完成5次做化疗后却未见好转，形容当时心情像跌入深渊：「做化疗好辛苦，自己变得好虚弱，好似徘徊生死边缘，又甩晒头发，冇以前咁好睇，觉得做咁嘢都冇用嘅，我仲医唔医得好呢？我仲近死亡近咗一步，成个情绪好崩溃，但我都好快收拾到，过咗几日就已经唔再谂呢样嘢，系咁提醒自己至少仲可以见吓朋友，仲可以开心到，唔好谂自己过得几咁困难。」 Koba开始治疗至今近9个月，现在正做第17次电疗，总共要做28次，「最辛苦系平躺做电疗会好痛，第一次做电疗时痛到呻吟，要用意志力忍住，做完副眼镜湿晒，只脚好似冇咗感觉，成个人震得好紧要，落床后跪喺出面十几分先平复到。」
现阶段Koba要靠吃止痛药同吗啡止痛，但吗啡份量不但越嚟越多，而且并唔能完全止痛，令佢相当辛苦。不过Koba依然正能量满满，答谢一直支持佢嘅人，「感谢大众可能唔认识我，但都好热心传讯息鼓励同捐款，好多谢你哋」。