放暑假成日都系行商场？今个夏天，不如带埋家人走入剧场！由文化体育及旅游局呈献、康乐及文化事务署策划，第三届中华文化节以「传奇」为题，将经典故事注入当代创意，系今个暑假一家大细最值得期待嘅盛事。限时闪购至4月30日，优惠高达七折，有心水节目要早啲行动！
开幕节目：「梦之队」经典《白蛇》新诠释
打头阵嘅舞剧《白蛇》，由偶像级国际芭蕾舞星谭元元担任艺术总监，率领内地及海外一线舞者组成「双卡司」星光熠熠。节目糅合芭蕾舞、中国舞、现代舞同武术，仲加入心理学元素，将故事重新解读，白娘子与许仙嘅千年传奇转化为探讨现代女性精神世界嘅旅程，带俾你耳目一新嘅体验。
中国戏曲节：顶级京剧武生飙技「大晒冷」
戏曲嘅魅力，又岂止「精彩」两个字咁简单？今年中国戏曲节阵容鼎盛，打头炮嘅「京剧大武生艺术展演」先声夺人──上海、北京、天津、湖北四大京剧院嘅顶尖武生难得齐集香港，同台献技。从悲凉激越嘅《林冲夜奔》、雄浑壮阔嘅《长坂坡、汉津口》，到机锋斗智嘅《三岔口》── 台台好戏，幕幕精彩。想睇文戏？江苏省演艺集团昆剧院《南柯梦》全本上演，昆曲名家施夏明坐镇，携手昆剧院优秀演员深情演绎汤显祖名著。新编粤剧《广陵散》以魏晋名士嵇康为主角，粤剧老倌龙贯天、邓美玲、阮兆辉、廖国森与新秀演员同台「斗戏」，在戏曲嘅传统梆黄与曲牌之间呈现文人风骨。仲有三个同属梆子声腔嘅地方剧种，激越唱腔与高难度武技兼备，同样不容错过！
古都洛阳 隋唐文化
洛阳除咗牡丹仲会谂起咩？今年文化节焦点城市就系古都洛阳！七月有洛阳豫剧院演出马派经典《穆桂英挂帅》外，更有「河洛连香江」展览，当中设以武则天为主题嘅换装体验。亲子必睇嘅《唐古百戏》，新疆生产建设兵团杂技团带来一场叹为观止嘅杂技盛宴，唔少得郑州歌舞艺术中心嘅《河洛唐舞》，舞者化身唐俑乐师翩翩起舞，十多篇舞蹈精品贯彻「让文物活起来」嘅主题，睇完仲想睇多场！
古韵舞乐跨界交融
听过太空音乐未？1977年美国太空总署将古琴名曲《流水》收录于金唱片送上太空。今个夏天，国家级非遗传承人姚公白喺「弦徽真趣」古琴音乐会中，首次公演1821年《指法汇参确解》谱书嘅版本。想要更多惊喜？本地音乐家马玮谦将传统唢呐、喉管与爵士乐碰撞出新火花，唢呐夹爵士，friend到夹band够晒香港味！钟意异域风情嘅，《丝路回响・胡乐新声》音乐会以乌德琴、马头琴等乐器演绎丝路旋律，从波斯走到长安！钟意大场面嘅话，荣获第十八届文华奖音乐奖嘅《乐和长歌》就啱晒您！湖北省博物馆镇馆之宝曾侯乙编钟一比一复刻搬上舞台，荆楚文化现眼前，喺香港难得一见！
免费节目
文化节仲有一系列免费延伸活动，包括将表演艺术带入社区嘅《多彩华艺》演艺嘉年华、「香港赛马会呈献系列：长安万象──陕西隋唐文明展」，以及不同类型嘅工作坊同讲座，免费入场，男女老幼都啱睇！
详情：https://www.ccf.gov.hk/tc/