林峯自爆試位差錯腳跌落樓 與任賢齊對打十字韌帶斷咗一半

林峯、胡子彤同張文傑呢日現身書店宣傳新片，雖然伍允龍日前謝票時遇上被觀眾肘擊，但無阻三位喺活動上同市民近距離接觸，解答大家對戲中嘅疑問，林峯仲分享戲中驚險場口，佢同任賢齊飾演嘅秋哥對打，而佢嘅十字韌帶斷咗一半都係因為呢場戲份。

胡子彤大爆喺片場搵林峯嘅時候，副導演同佢講林峯跌咗落樓，原來係林峯同武師試位時差錯腳由二樓跌落一樓，好彩有驚無險。

林峯話仲有成個鐘嘅打鬥嘅畫面，因片長問題被剪走，佢哋三人希望有機會睇番被剪走嘅畫面，因為當中有唔少有血有淚嘅付出，其實三人有問過若果票房去到某個數，可否推出加長版，但係遭到拒絕。

電影票房同口碑雙豐收，作為演員嘅佢哋都好開心，胡子彤話每次謝票見到大家用好熱烈掌聲歡迎佢哋就感受到。講到若果再謝票時，擔唔擔心有伍允龍同類遭遇發生，胡子彤覺得觀眾未必係想挑戰演員，純粹係想有近距離接觸互動。經過上次事件，佢哋亦會提高警剔加強自我保護。