顏米羔為中1生影演唱會海報 周吉佩笑言擺pose擺到腳軟

第一季《中年好聲音》嘅眾唱將，呢日拎晒樂器逼喺架𨋢度，原來係為咗6月舉行嘅中聲1演唱會拍攝海報呀，而幫佢哋操刀影相嘅攝影師，就係中2生顏米羔喇！一班中1生都讚米羔相當專業，不過佢哋就話呢次拍攝好考大家嘅肌力，十足十做gym一樣呀！

周吉佩話聽從米羔嘅攝影指示，就好似做咗一場深蹲運動咁，搞到佢影完腳都軟。而吳大強就話雖然只係影咗短位半個鐘，但係已經好考體力，因為大家都要Hold住個位置，不過可以影到一張靚海報，佢覺得一切都係值得呀。

李佳話事前大家都唔知會着咩衫，露出小蠻腰嘅龍婷都話自己嚟到現場先知會着露腰衫，佢仲笑言如果自己一早知要露腰，就起碼一個星期唔食炸雞呀！

吉吉就預告今次個騷入面佢哋每個人都會有突破，但由於監製落咗命令叫佢哋保守秘密，所以大家都唔知對方嘅突破係咩。龍婷就表示佢哋至今已經經歷過大大小小嘅舞台操練，大家對唱歌嘅追求更加熱情，所以大家都想將呢一年嘅成績畀大家睇到。羅啟豪就話自己暫時唔透過佢嘅突破係咩，問到而家跳舞對佢嚟講係咪唔算突破？佢就話自己仲有好多舞種未試過呀。而林鉫徫就話自己而家努力減磅呀！

而重拾本業為海報操刀嘅米羔，就分享自己今次嘅idea，仲話想畀到一種熱血嘅感覺大家呀！