余香凝電台受訪剖白舊戀情 為人母後展望子女成長努力演出

新鮮金像影后 余香凝 早前接受 車淑梅 主持嘅香港電台節目訪問，除咗分享得獎感受、亦提到同丈夫關係、兩位子女嘅成長過程，更憶述當年與舊愛分手所承受嘅輿論壓力。

於《白日之下》扮演記者勇奪今屆電影金像獎最佳女主角嘅Jennifer，笑說獲獎後3歲嘅女女同幼稚園班主任講，話媽媽得到一個公仔獎。以高䠷身形以模特兒身份入行13年嘅佢，當年仲因為太高而被同學起唔同花名：「我細個已經好高，同學叫我余巨型、余香茄子煲。好處係打排球可以成為正選。不過我有寒背嘅壞習慣。」

余香凝因為《白日之下》嘅演出榮獲金像影后

Jennifer亦罕有提及過往嘅感情事：「我初戀係一位已畢業嘅師兄，媽媽很開明，叫我帶佢返屋企見面。呢招數我要學，至少可以睇吓對方係咩人。我哋交往三年幾後分手，當時大家都唔開心，但又覺得係時候需要各自成長。」

余香凝 後來加入樂壇，亦開始接拍唔同電影，不過當年發生嘅一場車禍就引發外界嘅熱烈討論，佢話：「呢個係我人生一大衝擊，令我知道意外可以隨時發生，教我更珍惜生、愛家人要及時表達。當時我受咗傷好彩唔係好嚴重，可以繼續拍戲。車內仲有我當時嘅男朋友家樂(陳家樂)。我哋唔係因為呢場車禍而分手，當時大家嘅發展同性格唔同，係時候好好講再見，於是就分手喇。」

早年因為一場車禍而令外界紛起唔少對佢嘅批評

當時外界對余香凝大有睇法，更有人指佢愛財、變心：「呢件事話比我知原來做演員要承受輿論壓力。有啲人煽風，我要學識自己去調節。我清楚整件事，唯一可以做嘅就係做好自己。當時好唔開心，亦有好多網絡攻擊。不過慶幸因為《逆流大叔》、《非同凡響》等電影,我要出嚟謝票。令我收到好多前輩同影迷嘅鼓勵同支持，好窩心。我相信善良係存在嘅。(再見陳家樂會唔會感覺唔自然？)我哋都係為香港電影業努力嘅演員，都想做好自己。我有睇佢嘅電影，好開心大家都不停進步。」

佢又坦承當年同陳家樂分手嘅原因

余香凝 演繹真實事件改編嘅電影榮登影后，不過依然受到攻擊，佢話「我會話俾大家知我會繼續努力，即使有一啲侮辱字眼，我都希望對方能夠善良。」

至於年前突然宣佈成婚，Jennifer亦甜蜜分享同老公Tim嘅感情故事：「佢唔係才俊，我而家亦努力工作為家庭付出。佢係個老實人、唔花巧。老爺奶奶亦係平實同努力工作嘅人。我哋冇情節豐富嘅愛情故事。佢比我大13年，當年我27歲，佢已經40。佢嘅中文不太好，求婚時講咗一段老土說話。佢話好幸運遇上我，我係佢心中嘅天使。我仲記得生BB時非常緊張，叫佢準備一啲說話同我傾偈，結果佢都係講咗簡單兩三句。」

Jennifer同圈外老公婚後育有一子一女

已經身為兩孩之母嘅Jennifer，又表示唔介意接拍媽媽角色：「我成為媽咪後，最大嘅改變係對人嘅情感特別敏感，容易感受到其他人嘅情緒。母親節到咗，女女送咗學校做嘅手功當禮物。母親節當日我要開工，屋企所有女性都已經一齊食飯慶祝咗。媽咪鍾意旅行影相，我會送一部新電話俾佢﹐請佢去旅行。日後有能力都會請佢嘅朋友一齊旅行。至於我就最希望兩個小朋友健康快樂咁成長，喺呢個壓力大嘅社會入面，輕鬆咁探索同享受精彩嘅人生。」

唔需要開工時佢會將所有時間都陪伴兩個小朋友