王祖藍應邀電台宣傳新歌 親填詞表達對人歡笑內心憂傷

近來忙住為《福祿壽訓練學院》錄影同指導新一代扮嘢王嘅 王祖藍 ，同步推出新歌《小小丑》，日前佢就以歌手身份，接受 薛家燕主持嘅電台節目訪問，久未於電台受訪嘅佢仲話非常感謝家燕姐嘅邀請咁話。

家燕姐亦大讚 祖藍 同阮兆祥仲有李思捷主持嘅《福祿壽訓練學院》，令一班有天份但苦無機會表演嘅學生，終於有機會發揮。之後又恭喜祖藍推出新歌，祖藍話：「新歌叫《小小丑》，我哋有時對人歡笑背人愁！上一代唔會俾大家知道唔開心事，但呢一代完全唔同，可以大家分享。」

祖藍又話《小小丑》係分享喜劇演員嘅內心世界，坦言心中同任何人一樣會有抑鬱。今次佢亦親自為廣東話版填寫歌詞，普通話版本則與內地一位朋友合寫，作曲則係內地真人騷《披荊斬棘的哥哥》嘅一位歌唱指導。

祖藍今日又喺社交平台上載影片，與兩位乖女一齊為太太 李亞男 慶祝母親節，兩個寶貝先分別向媽咪獻花，而祖藍則負責為老婆加冕，亞男即露出一臉幸福笑容。