芷珊約您｜直闖王嘉爾澳門演唱會後台 Jackson分享孤身赴韓破釜沉舟之路

由 黎芷珊 主持嘅《芷珊約您》，今晚(12號)第4集嘅嘉賓係 王嘉爾，身為前港隊劍擊運動員，後來隻身到韓國加入練習生行列、經過不懈努力以男團 GOT7 成員身份出道，再單飛作個人發展。芷珊直擊Jackson首次巡唱嘅澳門站演出，仲同久未以廣東話受訪嘅Jackson 進行深度專訪，探討萬人迷嘅內心世界同了解演藝生涯到底有幾艱辛。

芷珊今晚會喺節目中同Jackson深情對話

芷珊喺巡唱前一日直闖綵排現場探班，體驗VVIP專屬環節，仲上台同Jackson零距離接觸，Jackson十指緊扣拖住芷珊，又主動揸機自拍、上落樓梯時又非常紳士出手攙扶，令芷珊冧爆高呼有心跳感覺，仲話：「我明佢啲fan 點解咁die hard，我已經入坑喇！」

Jackson出名寵粉，每站巡唱前例必舉辦VVIP綵排環節，同Fans近距離互動，佢曾喺巴黎站Fans求婚擔任見證人；騷前又對合照要求有求必應，更影足2小時！呢次芷珊更一早預備潤喉開聲禮盒送予Jackson，除咗人蔘仲包括一種非常特別嘅「食材」今晚節目自有分曉。

早前佢就直闖Jackson澳門演唱會，了解佢有幾寵粉喇 

雖然Jackson嘅Fans遍佈世界，又於各社交媒體坐擁數以百萬、甚至千萬計追蹤，單單IG已經有3300萬Follower嘅Jackson，偏偏謙指自覺只係剛起步，做任何事情都應抱住感恩心態：「我覺係啱啱開始，名氣又好、Popularity又好，我會覺得係泡沫， 隨時都可以冇。」

自小嚮往演藝夢、當年不顧家人反對勇闖K-Pop樂壇，Jackson回想時任劍擊港隊總教練嘅爸爸，當年曾開出俾他入行嘅條件：「爸爸半開玩笑話 『攞到冠軍畀你去』，講呢句說話即係唔畀我去，因為知我冇可能攞到。」

佢亦透露Daddy當年對佢入行未有大期望

Jackson當年不但犧牲參加奧運同入讀美國史丹福大學嘅機會，亦錯失咗同輩青年經歷嘅時光。佢2011年到韓國展開練習生生涯，初時對韓語一竅不通，眼見身邊練習生無論內外條件都滿分，Jackson有感技不如人，坦言第3日已想放棄：「技術又冇，生活所有嘢變晒，好孤獨。」「唯一可以同佢搏嘅，你做10個，我就做100個。我要先令到自己技術進步，想去邊間公司都去到。」

近乎10年未休息過嘅Jackson，今年踏入30歲，佢希望放慢腳步，帶父母去旅行；又展望自己10年後嘅兩個轉變，令芷珊非常驚訝直言：「唔好嚇我！」到底Jackso嘅10年計畫係咩呢？

當年毅然赴韓從頭起步嘅Jackson，如今已係世界知名嘅藝人

而芷珊亦邀請Jackson爸爸王銳基受訪，王爸爸直言當年有意刁難乖仔，不過見到佢目前驕人成績，亦坦言非常自豪；佢仲話Jackson向來報喜不報憂，從來未見過佢軟弱一面，王爸爸眼泛淚光話：「就算GOT7出道，佢真係用條命嚟搏，好努力。人哋禮拜六、日休息，佢就返內地跑行程，趁飛機來回時休息瞓覺，你話作為父母係咪好心酸……」

父母於台下欣賞演出，Jackson亦特別落力

呢場澳門站演出，王爸爸同王媽媽亦首次親臨現場睇騷，更上台同Jackson擁抱，寶貝仔更親吻父母面頰，畫面超溫馨。 芷珊呢集繼續要求嘉賓分享一個小秘密，Jackson又會爆咩料？佢亦會罕有談及愛情、婚姻觀，更分享手臂紋身背後嘅故事。

《芷珊約您》逢星期日晚 21:30 翡翠台