林德信兩月前升呢做人父 千金出世新碟完成雙喜臨門

去年11月結婚嘅 林德信 趁母親節正式公開自己兩個月前已為人父，小公主係由爺爺林子祥親自改名為  林明 ，Alex為答謝太太Candace，要好好慶祝太太人生第一個母親節之餘，又承諾要努力自己嘅演藝事業，另一個「BB」新專輯Hyperspace已製作完成，佢仲話要感謝太太照顧家庭，令自己可以專心事業。

婚事同生BB都超低調神秘嘅Alex，提到太太表現無限感激，佢話:「 呢兩個月見到佢坐月好辛苦，又唔出得街，只可以喺屋企湊仔，真係好攰。」而新手媽媽Candace就指老公一樣有幫手照顧自己同BB : 「其實Alex好緊張我又好細心，係一個暖男，冇咗佢我真係搞唔掂，Alex係換尿片高手! 」

林德信去年11月突然宣佈結婚，今日更公佈兩月前已經誕女

佢仲話Alex等候BB出世時非常緊張，Candace爆料話：「因為我係順產，喺產房等生嘅時候，護士問我老公去咗邊？Alex好緊張又坐唔定，所以常常周圍行希望放鬆一點，又知我等咗12個鐘仲未生得會好肚餓，所以去買蛋撻，我就係食住個蛋撻，多點氣力就生到BB！」

圈外太太仲踢爆Alex喺產房等候時非常緊張

Alex計劃遲啲一家去旅行，不過老婆Candace就話 : 「你幫我減肥就係最佳禮物，現在所有褲都唔啱著，要著Alex嘅褲 !」而Alex就指已做好準備全身再投入工作，努力搵奶粉錢。

Alex又指女女嘅名係由爺爺阿Lam親自改

Alex新專輯Hyperspace已製作完成，4首新歌屬於跨年代創作，由70年代去Disco到現代嘅電子音樂，以懷舊同現代結合， 第一首會推出同鄭嘉嘉合唱嘅《Drifting in Hyperspace (超空間)》，希望大家一聽就想跳舞。太太表示要修身減肥時，身為瑜伽導師嘅Alex，就想到將自己新歌嘅輕快節奏，用以編排一套修身減肥舞同太太一齊跳，佢笑言：「聽住我嘅新歌減肥最好不過， 歡迎大家都一齊跳。」