蕭正楠為《神耆小子》錄插曲 翻唱《但願人長久》訴男人淒楚

近年喺劇集挑戰過唔同角色嘅 蕭正楠 ，早前同伍仲衡、歐永權合體開騷再戰樂壇之餘，又推出新歌，阿蕭隨後亦於內地舉行多場演唱會。歌手出身嘅佢，近日演出《神耆小子》同 鄭則士 冤家路窄，而佢除咗演出之外，仲負責主唱插曲《但願人長久》，佬味滿瀉咁唱出男人心酸處。

呢日錄音時，佢就話歌曲一響起腦中已經充滿畫面，不過話晒歌曲都係 盧冠廷 嘅名作，過往亦曾有唔少翻唱版本，所以自己都有特別注意，亦非常開心可以再踏入錄音室呀。

劇中佢同 傅嘉莉 有緣無份，亦因為當中嘅故事而選用呢首歌曲，阿蕭就指角色重遇坦承過往嘅誤會，非常有意思呀。除咗插曲之外，阿蕭就話希望繼續有機會唱唔同歌曲，尤其早前完成新劇《奔跑吧！勇敢的女人們》同 吳若希 呢位劇集歌女王合作，仲話如果有機會合唱呢部作品嘅劇集歌就一流咁話。