StarTalk一氣呵成版丨支嚳儀稱揀Demo心情如選婚紗 無怪責當年媽媽反對自己入行

StarTalk一氣呵成版丨支嚳儀稱揀Demo心情如選婚紗 無怪責當年媽媽反對自己入行

支嚳儀(Venus)雖然參加完《中年好聲音》,又喺唔少騷上一展過歌喉,但因為一直以嚟都未有一首屬於自己嘅個人歌曲,所以佢總係覺得自己未稱得上係一位歌手。直到最近佢推出自己首支廣東歌《Gotta Try》,Venus先話自己可以喺創業家/媽媽後,加上「歌手」呢個職業呀。

Venus呢日接受 許文軒 《StarTalk》嘅訪問,對方問到佢有冇怪過媽媽當年一直反對佢入行做歌手?Venus坦言細個、心智未成熟時,有諗唔通點解自己唔可以去試,但就冇怪過媽咪唔畀自己去試。雖然喺當年參加《TVB全球華人新秀歌唱大賽2010》時曾奪「網絡最具人氣獎」,但Venus話因為媽媽思考事情嘅維度較高,當時對方反問佢點解一定要讀書完就入行?唔再歷練一下自己先?Venus指而家諗返轉頭,當時媽媽喺佢無任何保護網之下,唔贊成佢入行係做得好啱。

作為新手第一次聽Demo揀屬於自己嘅歌時,Venus話成件事好似揀婚紗一樣,當佢聽到《Gotta Try》Demo嗰一刻,就好似揀中命中注定嘅婚紗。由於過往都係唱英文歌多,所以Venus收到新歌歌詞嘅第一時間,就去咗搵韋綺姍幫佢改善廣東歌嘅技巧,佢仲話而家睇返當日參加《中年好聲音》嘅比賽片段,有種慘不忍暏嘅感覺呀。

外人睇Venus就覺得佢係人生勝利組,但Venus就話自己係「人生情商組」,因為佢覺得經歷嘅苦難只有自己知,但佢唔會將呢啲嘢掛喺嘴邊,同朋友閒聊嘅時候都係會傾點樣去解決個問題,而唔係喺情緒中沉溺,Venus話只要大家將個情商抬高,擴大內心,大家都可以係人生勝利組。

 相關推薦

熱門搜尋