2024香港小姐競選｜全男班行騷打頭炮招募港姐 曾志偉有意打造女子班底選美

TVB全城矚目年度選美盛事《2024香港小姐競選》喺5月13號正式展開全球招募，歡迎17至27歲合資格嘅佳麗，於6月10號前報名參加。總經理曾志偉先生主持啟動儀式，並宣布今年以「Proud to be a Woman」作為招募主題，特別搵嚟黎諾懿、袁偉豪(阿Ben)、朱敏瀚同丁子朗等一班型男行騷造勢，以全男班為港姐招募揭開序幕。

每年選美都會注入新構思，話明係選美，志偉透露有意打造全女班製作競賽過程：「包括主持、評審都係考慮中，屬其中一個選擇。」並將會出埠拍攝外景，正聯絡相關地方，計劃遠赴歐洲、中東等地，分組去不同地方體驗女性生活文化。

講到全男班行Catwalk既吸晴又有睇頭，志偉有所隱喻：「有部份都係香港先生出身，可能係個預告，都停咗幾年冇搞，嚟個全男班招募先。」諾懿同阿Ben同樣娶咗位港姐太太，原來兩人亦曾經喺同屆擔任港姐台灣外景嘉賓，仲記得一齊喺阿里山採茶。

一眾型男喺台上行Catwalk時自信十足，原來事前都好緊張，朱仔仲要一早綵排，行騷時緊張到手心出汗。而聽到志偉話有意復活香港先生競選，身為《2016香港先生選舉》亞軍丁子朗都好興奮話：「好呀，咁我終於可以卸任，我仲係應屈港男。」