志偉爆金剛瘀事 歷代獎老現身《獎門人》29年暫別觀眾感不捨

TVB《奬門人》系列喺過去嘅週日播出終極篇，呢集節目嘉賓陣容鼎盛，包括苗僑偉、謝天華、梁競徽、陳山聰、洪天明等組成奬門人身體健康隊，譚輝智、古淖文、顏米羔、王玥、陳俞霏、陳蒨葶組成中年好聲音2隊，以及福祿壽訓練學院隊伍，大家玩得非常盡興。作為中二生譚輝智星級頭號Fans嘅狄波拉（拉姑）專登捧場睇得不知幾開心。

雖然話就話天下無不散之筵席，但奬門人陪伴大家29年，觀眾好唔捨得同節目講拜拜，尤其係奬門人曾志偉，指雖然未知節目幾時再同觀眾見面，但佢哋會繼續發掘新遊戲及構思新玩法，務求節目有嶄新一面，繼續做到娛樂觀眾嘅宗旨，寄望獎門人30周年會再現。

呢集大部份獎老返嚟亮相，仲落場玩埋一份，到節目完結時佢哋都難掩不捨之情，同時感激奬門人對佢哋提攜，王祖藍回憶湧現，金剛則由完全唔識講廣東話，上節目學講半鹹淡中文令佢為人熟識。志偉更大爆金剛笑料：「我做咗兩年先知，我最初叫佢做節目最緊要夠自然，金剛以為係最緊要夠賤﹗」此外，中二生一眾女將雖然外表嬌滴滴，但玩遊戲絕對唔輸蝕，陳俞霏同陳蒨葶都不顧儀態出擊，又玩到碌晒地。