古仔將領軍赴康城參加影展 籲「王九」伍允龍出街小心防衛

以九龍城寨為背景嘅武打港產電影票房口碑雙豐收，上映12日香港票房經已突破四千萬，呢日古天樂、林峯、任賢齊、伍允龍、劉俊謙、胡子彤、張文傑、同戲中飾演「魚旦妹」小童星王尹菁等一齊現身戲院謝票。

電影上映之前，影片已獲國際矚目，成功入圍第77屆康城電影節「午夜展映」單元。古仔稍後會率領導演監製，以及城寨四少赴法國康城參展，一眾人都好期待，古仔話：「香港電影有十幾年冇入競賽影展，十幾年冇去過好期待，想睇吓康城有咩改變。」而林峯首次有參演電影喺國際上咁多人睇到，心情興奮。

被問有冇預計觀眾會挑戰佢哋嘅功夫？古仔笑指：「咁要帶埋伍允龍去先得喎﹗」古仔坦言有留意早前伍允龍喺謝票時遭觀眾突襲倒地，幸好並無大礙，並表示日後謝票時盡量不要有太多身體接觸，不過伍允龍飾演嘅角色「王九」太受歡迎，古仔叫佢自己出街都要小心啲。

講到劉俊謙獲封國民老公，謝票當日唔少自認係劉太嘅粉絲不惜以炒價幾百元，買飛入場見男神，對此劉俊謙表示受寵若驚，連小齊都話的確好多媒體講緊劉俊謙，透露以前成日聽吳建豪講伍允龍功夫好勁，今次合作先知對方咁打得。

電影工作者總會早前宣布推出新晉編劇學徒計劃，透過直接薪金補助，支持香港電影製作公司開設新職位聘請編劇學徒，鼓勵新血入行，作為總會會長嘅古仔透露計劃報名人數好踴躍，認為係一個好好嘅實習機會。