香港婚後事｜吳若希公審老公無懼被指女權至上 陳自瑤二選一竟想單身？！

《香港婚後事》第7集嘉賓係 吳若希（Jinny），身為敢言代表嘅Jinny自認有一套自己諗法，佢話：「我會將好多人擺喺心裏面唔敢講嘅嘢，全部講晒出嚟。」提到佢不時網上「公審」老公，Jinny解釋：「好多人覺得家醜不可外揚，但我唔係，唔啱嘅嘢我講咗好多次，而你都係唔聽嘅時候，我教唔到，咁就由出面嘅人教你，我係咁嘅心態。」

嘉賓吳若希分享自己同老公嘅另類相處方式

Jinny笑言老公未有因而投訴，皆因「佢知道佢講咗都冇用」，佢續指呢套方法唔係每個人都適合，要視乎另一半嘅性格，黎諾懿講明：「我自己唔得，如果老婆將家事擺上網，我會好嬲。」問到會唔會擔心被指女權至上？Jinny就話：「唔介意，冇所謂啦，幾好吖，咁樣我可以幫到老公擋好多嘢，佢唔想去嗰啲局，佢就會話我老婆唔畀！」

仲話早前拍攝《香港人在北京》而令婚姻關係改善

Jinny指同老公瘋狂鬥嘴係兩人嘅相處方式，佢話試過鬧到動真火，機智嘅Jinny老公會即時推仔女做「擋箭牌」，佢話：「佢知道我好嬲，就會推小朋友過去啜媽咪，我見到好得意就會忍唔住啜啖先，咁就唔會再嬲。」Jinny再話：「之前我去內地拍咗半年《香港人在北京》，嗰段時間佢發現冇咗老婆，好似人生冇咗一忽咁，自己要處理好多嘢，終於體諒到老婆嘅辛苦。」Jinny又話覺得《香港人在北京》挽救咗自己同老公嘅婚姻。問到會唔會覺得自己太早婚?Jinny竟然話：「其實自己一個更開心。」點解佢會咁講？節目中自有分曉。

佢亦分享咗一個朋友嘅出軌事件

之後講到「女方出軌」話題，Jinny分享咗一宗真人真事，Jinny話女事主為咗報復老公出軌，竟同老公好友搭上，之後更發現「外面世界好大」，相當花生。對於出軌話題，Yoyo亦有感而發：「男人又好女人又好，出軌可能只係一時衝動，就係為咗一刻嘅歡愉做錯事，無論做咩事都好，最緊要唔好為咗一時一刻嘅衝動、快樂，毀咗成個家庭，代價好大。」天宇就分享咗「人夫同印傭姐姐」發生不倫戀嘅真人真事，程度更係震撼三觀。

而Yoyo則認為有家庭嘅成年人，萬事都要以屋企為先作考慮

值得留意嘅係，今集新增「殘酷二選一」環節，天宇同Yoyo負責接受挑戰！面對「可以重新再揀，選擇單身定係結婚」這個殘酷話題，Yoyo竟然答「單身」，至於有「女神收割機」之稱嘅天宇，又會點抉擇「揀女仔睇樣定身形」、「鍾意女仔豐滿定纖瘦」等棘手問題？

《香港婚後事》逢星期四、五晚 22:30 翡翠台