梁詠琪巡迴15站告一段落 回憶難忘趣事下半年重返影壇

梁詠琪 去年二月起展開「時間遇上我們」巡迴演唱會，過去年半先後於15個城市演出，近日巡迴演唱會暫告一段落，呢段時間亦令Gigi留低唔少難忘「驚喜」。
 
Gigi話：「每次做演唱會都特別期待同興奮，將諗法以畫面同歌曲完美配合，以藝術角度講故事。今次第一次同監製Mark合作，又有老朋友趙增熹為舊歌重新編排，今次好多場面都係以舞蹈同戲劇形式去演繹。我喺排舞室第一次睇到就眼濕濕，非常震撼！」
 
歷時年幾嘅十多場演出亦有唔少難忘畫面，好似澳門站就有老公Sergio同囡囡Sofia驚喜現身送花，佢哋又帶領全場唱生日歌為自己慶生；深圳站遇上十號風球被逼改期、台北小巨蛋則係出道28年來嘅圓夢之旅；而南京站則有小意外，Gigi話：「有一par係用headset，唱到一半，突然『卜』一聲，咪就冇咗聲，然後我又要繼續跳舞同演戲，導演果斷立即為我換一個新咪，點知都係唔得，當刻要同排舞老師共舞，又要一直諗下一個動作要用邊隻手攞咪，當時十分刺激！而家回想都係一個好經驗。」

之後要除低外套演出時，Gigi又一直被外套手袖卡住，結果連咪都跌埋，Gigi當機立斷叫停音樂重新開始 。而啱啱過去嘅武漢站係呢一輪最後一站，Gigi特別加碼唱足30多首歌，廣東、國語經典全部唱勻，佢同觀眾都可以話滿載而歸。Gigi仲鬼馬地帶一個望遠鏡上台，將「山頂」位置嘅熱情觀眾都一一睇清楚。
 
忙足年幾之後，Gigi打算先放假充電：「真係要陪吓家人，會返西班牙探親過暑假，之後就投入電影拍攝；舊年一整年都忙巡迴，年底希望將時間先擺放去電影，又可以過過戲癮！」