劉威煌舉行聚餐與粉絲同樂 8月音樂會不排除騷肌

劉威煌 同佢嘅Fans舉行一年一度嘅聚餐，除咗有得食、有得玩、有得合照、仲有獎抽添，威煌仲私人準備咗啲小禮物，真係好開心呀。由於食飯場地無演唱會音響提供，所以原本威煌都無打算唱歌，但最後佢都諗盡方法即興唱咗幾首，好似《感激我遇見》、《不離不棄》同埋《夏日傾情》等等，Fans們真係High到爆呀。

往年嘅4月30日，威煌都會舉行音樂會，不過，今年佢就改咗喺8月生日月舉行，有更多時間準備，威煌無論喺歌曲抑或身形上都希望為Fans帶嚟驚喜，佢仲話如果到時身形好Fit嘅話，都唔排除會騷肌。

威煌忙住籌備音樂會嘅同時，佢每個星期都不忘同中二嘅戰友譚輝智同埋顏米羔等人開Live，威煌都話每次都好Enjoy呢個時刻，事關佢話比賽後，兄弟們都各有各忙，所以可以趁機聚下輕鬆下，佢都話特別珍惜呀。