人氣王譚輝智一出道即辦個唱 預告辦答問環節專答尖銳問題

譚輝智 身為《中聲2》嘅亞軍兼人氣王，5月尾仲會舉行首次個人演唱會，呢日父母、太太、一對子女仲有一班中二好戰友，就齊齊現身演唱會捧場打氣，而輝智亦即場獻唱，仲揀咗Eason嘅《忘記歌詞》幽自己冇記性一默呀。

一出道就有自己嘅個唱，輝智就話心情比參賽時更加緊張同大壓力，因為大家目光都會聚集晒喺自己身上呀。呢日大批歌迷亦都有到場應援，輝智嘅太太就負責幕後嘅唔少安排工作，令佢可以放鬆唔少喇。

呢日佢同Fans現場跳舞，唔知到時又會唔會喺舞台忘情演出呢？至於歌單方面，佢就指已經大致確定，仲有唔少快歌會為大家表演，不過首先就要好好練氣喇。素人出身嘅佢家景同過往經歷都非常令人好奇，輝智就指到時會安排答問環節，大家可以向佢提問，仲話問乜都得咁話喎。