第二度與韓國導演老公合作 湯唯演考古學家做足準備

湯唯 自嫁予韓國導演 金泰勇 之後，不時都會參與韓國電影演出，成績同口碑亦相當好，喺韓國電影圈越嚟越受歡迎。湯唯最近就再同老公金泰勇合作拍戲，呢日佢聯同朴寶劍、秀智、崔宇植等出席新戲記招。

其實未計夫妻檔合作，其實幾位演員經已夠晒話題，一出場已成焦點，尤其係兩位女神企埋一齊，真係相當吸睛。湯唯話呢次好開心，可以同韓國咁多位養眼又優秀嘅演員合作，佢仲大讚拍檔們性格非常好。而崔宇植同埋秀智都不約而同話拍攝過程非常愉快，而家電影終於可以展示比大家睇，佢哋都覺得好期待，希望觀眾會喜歡。至於朴寶劍就預告電影有好多催淚位，大家睇嚟要帶定紙巾入場啦。

今次係湯唯同老公繼2010年嘅《晚秋》再度合作，戲中講述透過虛擬世界，令互相思念嘅人重逢嘅故事，題材新鮮，而湯唯喺戲中要演繹一位考古學家，同時亦係一位媽媽，佢都做足功課，同真正嘅考古學家溝通，傾咗好多，同時亦都買咗好多考古學嘅書籍，而同小朋友相關嘅部分，佢一樣都做足準備。