福祿壽訓練學院｜鄭詠謙濕身Chok爆如林峯再現 趙亮昭倒吊瘋狂自轉炒熱氣氛

由阮兆祥、李思捷、王祖藍主持嘅扮嘢真人 Show《福祿壽訓練學院》本周日(19 日)播出第6集，三位導師所帶領嘅隊伍將要接受第三輪訓練主題 -「生死對決」，並就「主題扮嘢」、「一對一扮嘢」及「扮嘢自由題」三個回合進行對決，每次對決均可邀請同Team學員或導師助演，每場對決勝出學員直接晉級，輸嘅學員要進入危險區，本輪最終將淘汰5名危險區學員。
 今集專業評審係張達明。

今集播出首回合「主題扮嘢對決」，分別係《勁歌總選最受歡迎男女歌星》模仿戰及「咪咀大戰」，由專業評審張達明及現場觀眾評分。喺《勁歌總選》中，出戰學員有Team Fuk ：周百恩；Team Luk ：鄭詠謙（Moses）(助演麥嘉欣)； Team Sau：梁山山（助演郭浩皇）。「咪咀大戰」嘅出戰學員就有 Team Fuk：陶大衛（助演黃建東）、Team Luk：趙亮昭（助演吳兆麟、劉倬昕）； Team Sau：葉泓聲。
 王祖藍叫 Moses 要剝衫扮林峯。Sophia表演期間出奇不意的剝衫動作，更令現場尖叫聲再闖高峯。Moses走向觀眾席瘋狂扭動健碩身體兼擺 Chok 甫，又任由觀眾狂射水槍。

喺六輪表演之中，鄭詠謙同麥嘉欣嘅「濕身+剝衫」表演最吸睛！鄭詠謙以林峯喺《大唐雙龍傳》經典曬肌古裝造型獻唱《Let’s get wet》，身穿古裝嘅麥嘉欣就大跳辣身舞，為咗炒熱氣氛走向觀眾席，鄭詠謙瘋狂扭動健碩身體，任由觀眾狂射水槍，麥嘉欣亦向導師祖藍大派心心，喺表演期間出奇不意做出剝衫動作，令全場再度尖叫！

周百恩嘅表演勁感人。梁山山遠睇真係有幾分似古巨基。到底三位邊個最後會勝出呢輪對決呢？三個只能有一個贏架咋，好殘忍呀！

趙亮昭獻唱 《今晚夜》，由於阿昭唱同跳都冇樣精，令祖藍一開始非常擔心，後來祖藍意外得知阿昭識跳鋼管舞，就將呢個項目加入表演之中，結果阿昭憑強而有力嘅鋼管舞高難度動作「倒吊式瘋狂自轉五周半」，成功炒熱全場氣氛，祥師兄更一度驚嘆到成個彈起，連張達明都忍唔住大讚好強。

阿昭一出場啲表情已令大家好興奮，神乎其技嘅鋼管舞表演更係技驚四座。

上一輪對決得羅冠蘭點名力讚有女性魅力嘅葉泓聲，今次目標就係「大笑姑婆」吳若希，仲要咪咀獻唱其首本名曲《越難越愛》，落足心機苦練「若希式」笑容同經典動作，佢仲將腳毛剃曬；周百恩同梁山山嘅表演都各有各精彩，前者以真人真事改編嘅《青春常駐》暗藏洋蔥，令祥師兄感動至一度「講不出聲」；後者以思捷陳年假髮扮演古巨基獻唱《愛與誠》，至於與鄭中基9成撞樣嘅陶大衛就會用爆炸頭Look咪咀獻唱經典名曲 《青春豆》！

Gordon扮吳若希，連招牌動作，Gordon都學到十足。

但祖藍話 Gordon 似佢曾經扮過嘅蔡卓妍多啲咯。

陶大衛又會帶嚟咩驚喜呢？

《福祿壽訓練學院》逢周日晚八點半 翡翠台播映