福祿壽訓練學院｜鄭詠謙扮林峯騷肌趙亮昭鋼管舞晉級 祥師兄再變新鵝太高味斜骨能勝正

星期日晚播出嘅《福祿壽訓練學院》第六集，除咗有阮兆祥同李思捷再扮演何生新何太之外，三位Professor帶領嘅隊伍亦接受第三輪訓練主題「生死對決」嘅首回合挑戰「主題扮嘢」進行對決。

今次佢哋要面對嘅分別係《勁歌總選最受歡迎男女歌星》模仿戰仲有「咪咀大戰」，由專業評審 張達明 加上現場觀眾評分。最終兩個回合都由Team Luk勝出，以219分遠遠拋離第2名嘅Team Fuk達49分，學員鄭詠謙同趙亮昭直接進級，其餘兩隊共四名學員就要進入危險區。

以林峯《大唐雙龍傳》經典晒肌造型亮相嘅鄭詠謙，同「助演」麥嘉欣齊齊玩剝衫，麥嘉欣除低古裝後露出搶眼Bling Bling貼身裙，仲不斷將泡沬抹向鄭詠謙身上，又起身又踎低，更係 End Pose加送「嘟嘴吹泡」表情包。Team Luk導師祖藍事後更笑言麥嘉欣係「鏡頭detector」: 「佢無論點樣沖，都可以對到個鏡頭架喎。」而麥嘉欣就笑指：「我綵排評語係幫人沖涼沖得幾好。

鄭詠謙同麥嘉欣重現《大唐雙龍傳》嘅一段

至於趙亮昭就以「力的表演」鋼管舞贏盡觀眾掌聲，更有網民大讚佢表演「精彩過台慶」。由於兩位勝出者都係祖藍高徒，大家更大讚祖藍有料到兼冇得輸。

趙亮昭就演出鋼管舞

而其他精彩表演包括Team Fuk嘅周百恩聲演張敬軒獻唱《青春常駐》，絕無搞笑成分之餘亦暗藏洋蔥。幼年喪母、加上生父另組家庭嘅佢，4歲開始就由阿姨一手湊大；仲同時湊大百恩姐姐，以及自己嘅三名子女，對五兄弟姐妹照顧周到，堪稱「Super阿姨」。

為感激阿姨25年養育之恩，百恩喺導師祥師兄協助下，以舞台劇形式獻唱《青春常駐》，寄語阿姨「不要老」。由於內容真摯，張達明睇完都熱淚盈眶，更大讚主力編排嘅祥師兄用心，而周百恩事後就話：「阿姨好有勇氣收留咗我哋，一個人湊大我哋五個，對我哋每一個都好用心。」

周百恩以《青春常駐》向照顧佢同家姐長大嘅阿姨致敬

另一精彩推介係「翻版鄭中基」陶大衛，佢同「助演」黃建東跳唱《青春豆》，唔止造型似足原裝鄭中基同林子聰，就連鏡頭同浮誇表情， 亦非常接近原著，張達明亦忍唔住大讚陶大衛同鄭中基極為相似。

陶大衛則同東東重現《青春豆》

喺內地社交平台模仿鄭中基走紅嘅陶大衛，現實生活中亦經常被誤認為係本尊，坐的士時情況最為誇張：「成日有的士哥哥以為我係鄭中基，唔少仲由我一上車就開始播鄭中基啲歌播到我落車添。」

至於扮演吳若希《越難越愛》嘅葉泓聲，以一雙光滑美腿成功搶灘，網民仲大讚佢雙腳無敵靚，更笑言動作身形同吳若希似到十足，實際反串又似足蔡卓妍，相當爆笑。

葉泓聲騷美腿獻唱吳若希嘅《越難越愛》

呢集祥師兄、思捷仲有郭珮文，同幕後團隊齊心趕拍熱話人物內容亦正式曝光，祥師兄个還還原網紅「千語BB」，教大家釣金龜炮製龜苓膏妙法。透過後製，祥師兄再度神還原原型人物，獲觀眾大讚，短短7分鐘特備內容中，仲先後換上4個造型，分別係不同時期嘅新鵝太、新鵝太囝囝同「老千與BB」，製作認真。

鵝生同新鵝太再次登場