許冠文X黃子華新片康城影展先導海報曝光 窺探香港獨有喪禮燒衣及破地獄儀式

許冠文（Michael）同黃子華自《神算》後闊別32年再度傾力合演新片《破．地獄》，以殯儀業為題材嘅作品；無數戲迷敲碗已久，今日發布《破．地獄》先導海報，率先喺第77屆康城影展矚目曝光，向香港以至全球觀眾推介呢齣題材別樹一幟、演員組合強勁嘅港產片！

今日發布《破．地獄》先導海報，率先喺第77屆康城影展矚目曝光。

《破．地獄》特別鎖定於第77屆康城影展發放兩張先導海報，雖然僅可見Michael同子華背影，神秘色彩濃厚，但仍能分別窺探香港獨有嘅喪禮燒衣及破地獄儀式，黃子華坦言新片跟自己過往所演嘅電影完全唔同，絕對係一次新挑戰：「當日導演畀我睇呢部戲嘅大綱，我心頓時覺得執到寶，我一直在諗香港有咩獨特東西，值得我哋跟全世界去講？我發覺我哋嘅殯儀業，正係全世界獨有，企喺邊都有一席之地，《破．地獄》以香港獨特嘅殯儀業，去闡釋一個莊嚴主題，我𦧲飯應（去拍）！」

雖然僅可見Michael同子華背影，神秘色彩濃厚，但仍能分別窺探香港獨有嘅喪禮燒衣及破地獄儀式。

兩大殿堂級喜劇泰斗難得合作，《破．地獄》居然唔係一齣喜劇？子華親解謎團：「我覺得大家要有心理準備，電影有莊嚴嘅成分，並唔係講觀眾入場隨便歡度一段時光、『哈哈哈哈』睇完部戲可能會對你嘅人生帶嚟一啲改善，正如我同Michael，因呢部戲而改善對人生嘅一啲睇法，我拍完後覺得自己寬容咗，相信大家睇完之後，亦會比以前更加寬容、豁達！」

黃子華收許冠文電話以為係詐騙，讚香港殯儀文化破地獄夠精彩。

從影多年，集編導演於一身嘅Michael，一直認真看待電影事業，對每個劇本皆有嚴格要求，Michael表示《破．地獄》正係佢期待已久嘅好劇本：「拍完《破．地獄》，我對人生體驗多咗、闊咗、開心咗、世界又靚咗！」作為香港影壇首部聚焦殯儀業嘅作品，Michael形容主題正合佢意：「我有一個夢想，希望可以參與一部戲，並非為某個單一市場而做，冇中西方影子，故事好地道，完全反映香港特式，但全世界觀眾都會喜歡睇！只要你曾想過生死問題，睇完就會有所領略，然後感覺人生有意義，呢樣題材係整個地球80億人都會有興趣睇！」