「陳積」上月與妻現身節目談笑風生 顏國樑肺炎病逝終年71歲

資深演員 顏國樑 5月25號晚病逝，終年71歲。前年自揭患上鱗狀癌而需接受治療，仲多次徘徊鬼門關嘅佢，情況曾一度好轉，4月底仲同相隨多年嘅前藝員太太 霍潔貞 一同現身《直播靈接觸」，分享近年生活同「續命」嘅經過。

雖然得病後令聲音沙啞，不過顏國樑仍對相伴多年嘅太太非常體貼，據指佢因為希望同於TVB結識嘅太太留下美好回憶，於事首肯接受訪問，事前更多次叮囑要將太太「拍靚啲」，當時精神較早前大有好轉嘅佢，仍非常幽默，又提到抗癌嘅經歷。

早已決定過身後將遺體捐出作大體老師，供醫學研究用嘅佢，更指自己對生老病死非常豁達，認為人生過程有意義，過得開心就非常足夠，仲笑言「一出世開如就等死啦」。

演勢利市儈「​​陳積」一角深入民心嘅佢，同霍潔貞相愛逾40年，不過兩年前先正式註冊成婚。而當日邀請佢哋受訪嘅 梁思浩 ，就指知道顏國樑無甚心願，而呢次訪問亦係為圓呢對好友重回TVB一同緬懷過去嘅心願。

拍攝作品無數嘅佢，參與過多部處境劇演出，當中最為人記得嘅一定係《香港81》系列，經紀陳積一角搵錢為上，亦令佢當年大紅。之後又曾參與過《季節》、《真情》同《十月初五的月光》等角色演出。