《神耆小子》結局篇︱蕭正楠為愛情霸氣講數 羅毓儀變金總幫鄭則士

嚟到結局周嘅《神耆小子》劇情愈趨緊張，噚晚（27號）講到被激到心臟病發入院嘅大海( 鄭則士 飾)，好彩最終無大礙。孫女金多多( 羅毓儀 飾)心痛大海獨力難支，決定跟大海學做生意管理錢萬世集團。換上行政Look嘅多多化身職場女強人「金總」，處理公司事務頭頭是道，深得大海歡心。據知，隨著劇情發展，Yuki將會有180度大轉變展現反差面。

大海因為心臟問題入院，多多就決定加入公司學習做生意

同有方( 傅嘉莉 飾)舊情復熾嘅阿勇( 蕭正楠 飾)約咗大海到大牌檔「講數」，阿勇開宗明義話：「我想做你女婿，我想你做我外父！」為表誠意，阿勇仲做咗一份收入報告畀大海，證明自己絕對有能力照顧有方，惟大海唔領情，仲倒走阿勇為佢斟嘅啤酒，激動嘅阿勇霸氣發表愛的宣言：「你同唔同意都好，我哋都唔會分開，係有方尊重你，我先低聲下氣嚟求你，我依家畀兩個選擇你，一係多半個仔，一係冇埋個女！」

阿勇同有方重燃舊情，不過大海就唔太領情喇

其實大海只係想試探阿勇，見到阿勇嘅勇氣，大海講出心底話：「我最大缺點就係過目不忘，你點樣對仙女(有方)、點樣照顧佢、點樣關心佢，我係睇到晒記住晒！女係老竇嘅情人，恭喜你搶咗我情人！」場面感人。

Kent哥早前接受《星光路上》專訪，分享入行幾十年來嘅片段

此外，Kent哥早前接受TVB娛樂新聞台節目《星光路上》專訪嘅完整版日前播出，暢談入行經歷，感激母親支持而改變人生，演藝路上視周潤發為啟蒙老師及大恩人，以及電視與電影圈發展至與家人相處點滴，觀眾可以瀏覽TVB娛樂新聞台YouTube及Facebook頻道重溫Kent哥《星光路上》專訪。

《神耆小子》結局篇 星期一至五晚 21:30 翡翠台